Былы кіраўнік выведкі Нямеччыны Аўгусьцін Ханін сьцьвярджае, што дзяліцца з Аўстрыяй сакрэтамі NATO небясьпечна. Прычына — рост занепакоенасьці заходніх выведак з нагоды шчыльных сувязяў паміж высокапастаўленымі аўстрыйскімі міністрамі і Расеяй, паведамляе Голас Амэрыкі.
Асьцярогі з нагоды дабранадзейнасьці Аўстрыі ў пляне абмену інфармацыяй зьявіліся яшчэ ў лютым летась, калі быў праведзены паліцэйскі ператрус у штаб-кватэры галоўнага выведнага ведамства Аўстрыі. Зьявіліся чуткі, што рэйд быў падстроены ўльтраправым урадам з палітычных прычынаў.
«Зразумела, пры абмене інфармацыяй выконваецца гранічная асьцярожнасьць, — адзначыў былы кіраўнік нямецкай зьнешняй выведкі БНД Аўгусьцін Ханін у інтэрвію газэце Bild. — Для абмену разьведнай інфармацыяй вельмі важна, што ўсе бакі могуць быць упэўненыя: у руках службы-партнэра сакрэтная інфармацыя ў бясьпецы. Гэта, зразумела, вельмі складана, калі такая сытуацыя ў Аўстрыі».
Высокапастаўленыя прадстаўнікі «Партыі свабоды», якая ўваходзіць ва ўрадавую кааліцыю разам з Аўстрыйскай народнай партыяй, заклікае адмяніць заходнія санкцыі ў дачыненьні да Расеі, уведзеныя ў сувязі з анэксіяй Крыму. Аўстрыя не падтрымала скаардынаваную высылку расейскіх дыпляматаў пасьля атручваньня Сяргея і Юліі Скрыпалёў у Вялікабрытаніі, адказнасьць за якое ўскладаюць на Крэмль.
Збліжэньне паміж «Партыяй свабоды» і Крамлём стала асабліва відавочна на мінулым тыдні, калі расейскі лідэр Уладзімір Пуцін стаў зорным госьцем на вясельлі аўстрыйскай міністаркі замежных спраў Карын Кнайсьль. Прысутнасьць Пуціна ператварыла прыватнае мерапрыемства ў востра-палітычнае і выклікала буру крытыкі на адрас Кнайсьль, якая зрабіла рэвэранс перад расейскім лідэрам.
Газэта Washington Post напярэдадні вясельля Кнайсьль паведаміла, што некалькі заходніх выведак спынілі абмен канфідэнцыйнай інфармацыяй з аўстрыйскімі калегамі, турбуючыся, што іх таямніцы могуць трапіць у рукі Масквы. У ходзе лютаўскага рэйду былі канфіскаваныя шматлікія сакрэтныя дакумэнты.
Антыімігранцкая «Партыя свабоды», заснаваная былымі афіцэрамі СС у 1950-х гадах, увайшла ў склад ураду ў канцы мінулага году, а ў 2016 годзе партыя падпісала афіцыйнае пагадненьне аб супрацоўніцтве з «Адзінай Расеяй». У чэрвені Пуцін падкрэсьліў збліжэньне паміж Масквой і Венай, выбраўшы Аўстрыю ў якасьці напрамку сваёй першай замежнай паездкі пасьля перавыбраньня.
Лютаўскі рэйд у галоўнай службе выведкі Аўстрыі афіцыйна праводзіўся ў рамках сумеснай апэрацыі з Паўднёвай Карэяй як частка расьсьледаваньня аб вытворчасьці падробных паўночнакарэйскіх пашпартоў у Аўстрыі. Аднак у выведцы мяркуюць, што рэйд меў больш злавесную мэту — знайсьці падставы для замяшчэньня дзеючых чыноўнікаў прыхільнікамі «Партыі свабоды».
Пуцін у сераду падкрэсьліў, што яго прысутнасьць на вясельлі Кнайсьль мела прыватны характар. Аднак, выступаючы перад журналістамі ў Сочы, ён адзначыў, што ў ходзе сьвяткаваньня ён здолеў паразмаўляць як зь міністаркай замежных спраў, так і з канцлерам Аўстрыі. Ён таксама высока ацаніў ролю Аўстрыі ў выбудоўваньні дыялёгу паміж Расеяй і ЭЗ.
Аўстрыя — не адзіная краіна NATO, якая выклікае занепакоенасьць у заходніх выведак на фоне ўздыму дружалюбных Крамлю папулісцкіх партый па ўсёй Эўропе. У сакавіку «Голас Амэрыкі» паведамляў, што амэрыканскія спэцслужбы праводзяць ацэнку таго, якой інфармацыяй можна дзяліцца зь італьянскімі калегамі. Гэта здарылася пасьля таго, як у Рыме была сфармаваная кааліцыя ультраправай партыі «Ліга» і «Руху пяці зорак», які выступае супраць істэблішмэнту. Як і «Партыя свабоды», «Ліга» мае пагадненьне аб супрацы з «Адзінай Расеяй».
Амэрыканская выведка асьцерагаецца выцечак інфармацыі ў Маскву. «Рызыкі, відавочна, павялічыліся б, — сказала ананімная крыніца ў выведцы. — Будзе рэзка скарочаная колькасьць інфармацыі, якую мы прадстаўляем італьянцам, хоць гэта не паўплывае на нашае супрацоўніцтва ў сфэры барацьбы з джыгадзізмам і тэрарыстычнымі пагрозамі».
