Актывісты хочуць зладзіць у доме культурную пляцоўку, але пакуль ня маюць грошай на тое, каб купіць будынак — зьбіраюцца адкрыць краўдфандынгавую кампанію.
Моладзевае аб’яднаньне «Зьвяз» з Воршы гатовае выкупіць прыватны дом на вуліцы Караткевіча, у якім некалі жыў пісьменьнік Уладзімер Караткевіч, піша Orsha.eu. Папярэднія перамовы з уладальніцай ужо прайшлі.
«Зьвяз» абяцае, што калі дом атрымаецца выкупіць, то там зладзяць публічную пляцоўку для культурных і грамадзкіх мерапрыемстваў. Цяпер домам валодае дачка мужа пляменьніцы Ўладзімера Караткевіча, ды яна жыве ў Адэсе, ва Ўкраіне, і да апошняга часу здавала будынак у арэнду.
Пакуль грошай на тое, каб купіць дом, у «Зьвязу» няма — арганізацыя мяркуе запусьціць збор сродкаў на краўдфандынгавай плятформе «Талака». Калі не атрымаецца сабраць грошы да верасьня, «Зьвяз» мяркуе «ўзяць шэфства» над домам і даглядаць яго, пакуль ня змогуць выкупіць цалкам.
Абвестка аб продажы дому зьявілася на сайце Realt.by. Дом мяркуюць прадаць за 33,8 тысячы рублёў — 17 тысячаў даляраў. У самой абвестцы Ўладзімер Караткевіч ня згадваецца, прозьвішча гучыць толькі ў назьве вуліцы.
«Домам Караткевіча» будынак называе Tut.by, але фактычна гэта ня дом, якім валодаў Уладзімер Караткевіч — гэта дом ягоных бацькоў. Ды менавіта там Караткевіч пісаў шэраг твораў, у тым ліку першую вэрсію «Дзікага паляваньня караля Стаха» — аднаго з самых вядомых ягоных твораў.
Караткевіч там жыў у школьныя гады і ў час працы ў школе, да пераезду ў Кіеў на навучаньне, пасьля заяжджаў туды ў госьці да бацькоў, жыў там апошнія паўгода да сьмерці. Будынак зьявіўся там, дзе стаіць цяпер, у 1945 годзе, але быў збудаваны раней — бацькі пісьменьніка выкупілі дом зь вёскі і перавезьлі ў горад.
