Канцлер Нямеччыны адказала на крытыку з боку прэзыдэнта ЗША, якая прагучала сёньня падчас сустрэчы Дональда Трампа з генэральным сакратаром NATO Енсам Столтэнбэргам.
Яны тычыліся неабходнасьці павялічыць вайсковыя выдаткі ўсіх чальцоў альянсу, у першую чаргу — Нямеччыны. Трамп абвінаваціў Нямеччыну ў поўнай залежнасьці ад Расеі з прычыны паставак расейскіх нафты і газу. Мэркель на гэта адказала:
«Я сама адчула, як частка Нямеччыны кантралявалася Савецкім Саюзам. І я вельмі рада таму, што сёньня мы аб’яднаная і свабодная Нямеччына. І таму мы можам сказаць, што мы праводзім уласную незалежную палітыку і прымаем свае ўласныя рашэньні».
Асноўную незадаволенасьць Трампа выклікала тое, што ўлады Нямеччыны нядаўна выдалі дазвол на будаўніцтва і эксплёатацыю трубаправоду «Паўночны паток-2», па якім расейскі «Газпрам» зьбіраецца пастаўляць у Нямеччыну і іншыя краіны Эўразьвязу 55 мільярдаў кубамэтраў газу штогод. Старт паставак намечаны на канец 2019 году.
Як паведаміла «Нямецкая хваля», учора, напярядэдні саміту NATO, прэзыдэнт Нямеччыны Франк-Вальтэр Штайнмаер выказаўся наконт супярэчнасьцяў паміж Эўропай і Амэрыкай. Ён заклікаў краіны ЭЗ узяць на сябе адказнасьць за бясьпеку ў Эўропе.
«Сытуацыя ў Эўропе ў сфэры бясьпекі зьмянілася, мы зьяўляемся сьведкамі зьменаў і ў адносінах паміж Эўропай і Амэрыкай» — сказаў Штайнмаер.
Паводле яго, павелічэньне выдаткаў на абарону да 2% ВУП, як таго патрабуе Вашынгтон, ня варта разглядаць як важную мэту, паколькі яе дасягненьне яшчэ не гарантуе бясьпекі. Палітык прызнаў, што Нямеччыне яшчэ далёка да выкананьня гэтай мэты. Цяпер краіна выдаткоўвае на абарону 1,24% ВУП і плянуе давесьці гэты паказчык да 1,5% да 2024 году.
Трамп сёньня запатрабаваў, каб Нямеччына павялічыла свае вайсковыя выдаткі да 2% ВУП неадкладна.
