У Брусэлі сёньня адкрываецца саміт ЭЗ, галоўным пытаньнем якога стане тэма міграцыі.
Канцлерка Нямеччыны Ангела Мэркель напярэдадні саміту выступіла ў бундэстагу і заявіла, што краінам Эўропы неабходна выпрацаваць адзіную палітыку ў пытаньні міграцыі. Паводле Мэркель, усе краіны ЭЗ адзіныя ў жаданьні скараціць нелегальную міграцыю.
Як заявіла Мэркель, у выпадку, калі ўсім 28 краінам ЭЗ не ўдаецца дамагчыся агульнага прымальнага рашэньня, то трэба заключыць дамовы паміж тымі краінамі, якія згодныя на агульны падыход.
У звароце да бундэстагу Мэркель абараняла сваё рашэньне 2015 году расчыніць дзьверы Нямеччыны мільёнам уцекачоў у якасьці неабходнага кроку дапамогі суседзям, паведамляе агенцтва Reuters. Пры гэтым, паводле Мэркель, цяпер надышоў час аднавіць больш жорсткі кантроль за іміграцыяй.
«Эўропа сутыкаецца са шматлікімі праблемамі, але міграцыя можа стаць для ЭЗ адной з галоўных», — сказала на заканчэньне канцлерка, падкрэсьліўшы, што нельга дазволіць, каб рознагалосьсі ў гэтым пытаньні разбурылі ЭЗ.
Рэформы міграцыйнае палітыкі, у прыватнасьці, патрабуе Італія, якая апошнім часам закрывае свае парты для судоў з уцекачамі з Афрыкі. Шэраг краін Цэнтральнай Эўропы выступаюць катэгарычна супраць пераразьмеркаваньня ўцекачоў у рамках ЭЗ.
Адсутнасьць пагадненьня паміж краінамі ЭЗ можа аслабіць пазыцыі Мэркель у самой Нямеччыне, дзе з прычыны пытаньня міграцыі існуе пагроза ўрадавага крызісу.
