Некалькі гадоў таму ў возера Шо, што на Глыбоччыне, улады забралі геаграфічны цэнтар Эўропы. Але забраць некранутую прыгажосьць гэтых лясных мясьцін немагчыма. Я ня быў тут даўно. Дзесяць гадоў таму тутэйшыя вёскі яшчэ не былі такімі бязьлюднымі. На дарогах часьцей сустракаліся калёсы і мінакі. А яшчэ дзесяць гадоў таму ў ваколіцах возера Шо ня было ніводнай аграсядзібы. Сёньня іх ужо каля дзясятка. Не зьдзіўлюся, калі праз чвэрць стагодзьдзя гэты зацішны куток цалкам будуць насяляць аграгатэльеры ды іхныя госьці. Што рыхтуюць для сваіх гасьцей гаспадары сядзіб? Чым зьбіраюцца прывабліваць гасьцей гаспадары сядзіб? Каго чакаюць? І ці можна ў іх адчуць Беларусь? Давайце пракацімся па цэнтры Эўропы.