У 32-ю гадавіну чарнобыльскай катастрофы ў Менску адбыўся «Чарнобыльскі шлях» — штогадовая акцыя ў памяць аб ахвярах аварыі на ЧАЭС і яе наступстваў. Сёлетняе шэсьце распачало разьлічаную на паўгода кампанію супраць будаўніцтва Беларускай АЭС пад назвай «Астравецкі шлях».
Акцыя, дазволеная Менгарвыканкамам, распачалася на пляцоўцы каля кінатэатру «Кастрычнік», адкуль шэсьце прайшло да чарнобыльскай капліцы (храма ў гонар абраза Божай Маці «Адшуканьне згінулых») у парку Дружбы народаў. Там прайшоў традыцыйны мітынг.
