Ліст за подпісам пракурора аддзелу Клябанава дайшоў зь вялікай затрымкай і канстатуе: (цытата) «Геніюш Л.А. прызнана не падлеглай рэабілітацыі».
«Мы лічым такі адказ выключна палітычным і працягам калясавецкай ідэалёгіі, — перакананыя актывісты „Моладзі БНФ“. — Рэабілітацыя Ларысы Геніюш ёсьць адным з прынцыповых пытаньняў рэабілітацыі рэпрэсаваных літаратараў і дзеячаў Беларусі, якія выступалі супраць антыбеларускай бальшавіцкай ідэалёгіі і змагаліся за праўду. Мы працягваем кампанію #Геніюш2016. Наступныя крокі — мерапрыемствы ў гонар Ларысы Геніюш і заснаваньне літаратурнай прэміі ейнага імя».
#Геніюш2016 — гэта кампанія «Моладзі БНФ» у справе рэабілітацыі выдатнай беларускі, паэткі і грамадзкай дзяячкі.
Летась 5 ліпеня адбыўся стартаваў першы этап, падчас якога быў распачаты збор подпісаў за рэабілітацыю Ларысы Геніюш. За кароткі час у падтрымку праграмы падпісаліся больш за 1200 чалавек.
На другім этапе актывісты працягвалі зьбіраць подпісы (як афлайн, так і анлайн), а таксама патрабавалі надаць адной з вуліц у Зэльве імя паэткі, паставіць ёй помнік і ўключыць ейныя творы ў школьную праграму.
Найбліжэйшай імпрэзай у гонар Ларысы Геніюш будзе прагляд кінастужкі «Няскораная» ў сядзібе БНФ 13 траўня. Cтужка прымеркаваная да 100-гадовага юбілею вялікай беларускі. У ёй выкарыстоўваюцца ўнікальныя кіна- і аўдыёзапісы, рэдкія і малавядомыя фотаздымкі. Сваімі думкамі пра Ларысу Геніюш дзеляцца Ўладзімер Арлоў, Аляксей Пяткевіч, Міхась Чарняўскі, Данута Бічэль ды іншыя.
