Як сказаў БелаПАН мясцовы актывіст Аб’яднанай грамадзянскай партыі Мікалай Чарнавус, 7 сакавіка пратаколы за парушэньне парадку арганізацыі і правядзеньня масавых мерапрыемстваў склалі на яго, яго бацьку Мікалая Чарнавуса, а таксама Міхаіла Стрэльчыка, Барыса Шырынгу і яшчэ аднаго ўдзельніка, прозьвішча якога ён ня ведае.
Дата разгляду адміністрацыйных спраў пакуль не вядомая.
«Ня буду казаць за ўсіх, але мяне з бацькам гэтым не запалохаць. Мы працягнем дабівацца адмены дадзенага антыканстытуцыйнага дэкрэту», — сказаў Чарнавус-малодшы.
Ён нагадаў, што ў Баранавічах 26 лютага на плошчы Леніна ў акцыі супраць дэкрэту № 3 узяло ўдзел каля 300 чалавек. На мітынгу выступіў старшыня Аб’яднанай грамадзянскай партыі Анатоль Лябедзька.
Удзельнікі акцыі прынялі рэзалюцыю, галоўнае патрабаваньне якой — адмяніць дэкрэт.
