Так пастанавілі сёньня на пасяджэньні прэзыдыюму Беларускага прафсаюзу радыёэлектроннай прамысловасьці (РЭП).
«Людзі па-ранейшаму ідуць у рэгіянальныя пункты, дзе можна ў пісьмовым выглядзе выказаць свой пратэст, — кажа Свабодзе прафсаюзны кіраўнік Генадзь Фядыніч. — Мы ня можам ім адмовіць. Такія настроі ў грамадзтве не сьціхаюць. Таму вырашылі працягнуць акцыю. На сёньня маем 47 тысяч подпісаў, і гэта яшчэ ня ўсё.
Нашы актывісты прагназуюць, што актыўнасьць удзельнікаў масавых акцыяў будзе нарастаць. Цяпер пайшлі адказы на нашы запыты і патрабаваньні з розных уладных структураў. Але ж чыноўнікі пішуць фактычна пад кальку. Яны ня бачаць у гэтым болю і праблемаў людзей. У іх адзін адказ — мы ня бачым падставаў адмяніць дэкрэт.
Такая рэакцыя чыноўнікаў, у тым ліку дэпутатаў Палаты прадстаўнікоў, моцна раздражняе насельніцтва. Людзі бачаць, што ўлады зь імі ня лічацца, і таму іхны настрой на пратэсты толькі павялічваецца».
