У цэнтры Кіева, ва «Ўкраінскім доме» на Эўрапейскай плошчы, адбылася цырымонія разьвітаньня з журналістам Паўлам Шараметам.
Разьвітаньне праходзіла ад 11-й да 14-й гадзіны. Сотні людзей прыйшлі з кветкамі да труны Паўла Шарамета. Спачуваньне яго родным выказалі прэзыдэнт Украіны Пятро Парашэнка, дэпутаты, міністры, журналісты і іншыя.
Сёньня ж самалётам цела Паўла Шарамета прывязуць у Менск. Пахаваньне адбудзецца 23 ліпеня. Трызна пройдзе а 11:00 у царкве Ўсіх Сьвятых (Менск, вуліца Каліноўскага, 121). Пахаваюць Паўла Шарамета побач з бацькам на Паўночных могілках у 14:30.
Павал Шарамет загінуў раніцай 20 ліпеня ў выніку выбуху аўтамабіля, у якім ехаў на працу. На гэты момант сьледзтва разглядае шэсьць вэрсіяў яго забойства: прафэсійная дзейнасьць, непрыязнасьць у адносінах або асабістыя матывы, расейскі сьлед (дэстабілізацыя сытуацыі ва Ўкраіне), замах на Алёну Прытулу. Яшчэ дзьве вэрсіі праваахоўныя органы пакуль не агучваюць.
Людзі праводзяць труну аплядысмэнтамі і скандуюць: «Героі не паміраюць!» і «Жыве Беларусь!»
Калі выйшлі мама Паўла Шарамета і яго грамадзянская жонка Алёна Прытула, усе сталі скандаваць «Спачуваем!»
Поўнае відэа цырымоніі разьвітаньня з Паўлам Шараметам у Кіеве.
