У Лоеве затрымалі журналіста-фрылянсэра Кастуся Жукоўскага
Журналіст паведаміў, што затрыманьне зьдзяйсьняла кіраўніцтва раённага аддзелу ўнутраных спраў, якое адмовілася камэнтаваць сытуацыю.
Паводле слоў журналіста, Канстанціна Жукоўскага, ён з апэратарам здымаў цэглавы завод, які знаходзіцца ў цяжкім эканамічным стане, дзе працаўнікі атрымліваюць мізэрны заробак, а іншай працы ў райцэнтры няма:
«Прыехала міліцыя, мяне і калегу Аляксея брутальна затрымалі, даставілі ў РАУС, кінулі ў дзяжурную частку. Апаратуру вырвалі з рук, паламалі. Мяне ў дзяжурнай частцы павалілі на падлогу, надзелі кайданкі, станавіліся нагой на галаву, прычым, рабіў гэта чалавек, які назваўся намесьнікам начальніка РАУС Генадзем Маджарам», — апавёў па тэлефоне Жукоўскі БелаПАНу.
Паводле слоў журналіста, у яго падняўся ціск, яму выклікалі хуткую дапамогу, зрабілі ўколы. Міліцыя складае пратаколы. У Лоеўскім РАУС сытуацыю не камэнтуюць.
