Лукашэнка: Кажуць, прыйшлі і арыштавалі, а заўтра прыйдуць па іншых. Вядома, прыйдуць!

Лукашэнка — дэпутатам: вы ўсе мае дзеці

Лукашэнка заявіў, што ў новым складзе Палаты прадстаўнікоў ён бы хацеў бачыць 30% дэпутатаў з папярэдняга скліканьня.

«Я ня буду хаваць, што асобныя дэпутаты мяне ўжо просяць аб падтрымцы на новы тэрмін. Гэта нармальна, і вы гэтага не саромейцеся. Вы ў гэтай залі павінны вызначыцца, зыходзячы з нашага крытэру пераемнасьці новага парлямэнту, хто з вас хоча і ў стане працаваць у новым парлямэнце. Трэба будзе падтрымка — вы ж ведаеце, што ў мяне тут ні ворагаў, ні праціўнікаў няма — вы ўсе мае людзі, мае дзеці, і я буду вас падтрымліваць усяляк так, як вы вызначыцеся», — падкрэсьліў ён.

Віталь Цыганкоў: «Заканатворчая праца — самая цяжкая, амаль як навуковая». Бадай, самая сьмешная заява Лукашэнкі, улічваючы тую «напружанасьць», зь якой працуюць цяперашнія дэпутаты Палаты прадстаўнікоў. Прымаюць закон за 5 хвілін, зьбіраюцца на сэсію на 1-2 дні і аўтаматычна, без дыскусіяў, галасуюць за прадстаўленыя законапраекты.

Лукашэнка: калі патрэбен штык — у нас гэтага дабра хапае

Пра ролю СМІ:

«Паклёпу, розным інсынуацыям трэба даваць рашучы адпор. Калісьці ў нас існаваў добры выраз: да штыка прыраўняць пяро. І, дарэчы, усе кіраўнікі найбуйнейшых СМІ ў нас калісьці гэты штык насілі пры сабе. Але ці то штык падзатупіўся, ці то пяро згубілася. Вось гэтую баявітую здольнасьць актыўна і прафэсійна весьці дыскусію, адстойваць канструктыўную пазыцыю сёньня як ніколі важна ўзяць на ўзбраеньне нашым газэтам, часопісам і тэлеканалам. Дарэчы, калі патрэбен штык — у нас гэтага дабра хапае, гэта да міністра абароны».

Лукашэнка: Трэба нарадзіць новага настаўніка

Лукашэнка пра праблемы адукацыі:

«Калі настаўнік ня зробіць у бліжэйшы час некалькі крокаў да гэтай вяршыні (Лукашэнка не ўдакладніў, да якой. — РС), мы будзем мець праблему ўжо не заробкаў настаўнікаў, не даходаў і жыльля, мы будзем мець праблему з самім настаўнікам. Таму трэба выхаваць, нарадзіць новага настаўніка. Нарадзіць новых — гэта доўга. Таму нараджаць будзем, перарабляючы старое настаўніцтва. Трэба ўскалыхнуць нашага настаўніка. Трэба прымусіць настаўніка працаваць зь сям’ёй, як гэта было ў наш час, калі настаўнік такі ж час, як у школе, быў у сям’і свайго вучня. Давайце паглядзім: ці так гэта сёньня? Ці жыве настаўнік праблемамі вучня? Не».

Валер Карбалевіч: Высновы пра эканамічны разьдзел пасланьня

Няма прызнаньня самога факту сацыяльна-эканамічнага крызісу. Няма аналізу яго прычынаў. За два гады сярэдні заробак у краіне ў валюце зьменшыўся амаль удвая, а кіраўнік дзяржавы робіць выгляд, што нічога не адбываецца. Ня трэба ніякіх перамен, рэформаў, будзем працягваць ранейшы курс. То бок няма адказу на пытаньне, якое хвалюе грамадзтва.

Валер Карбалевіч: «Мы ня маем намеру зьмяншаць памер пэнсіяў». Як казаў Міхаіл Жванецкі, «і асаблівая падзяка за кефір».

Лукашэнка: палова пэнсіянэраў даўно ўжо зразумелі, што трэба працаваць, і працавалі

Лукашэнка выказаўся пра павышэньне пэнсійнага ўзросту:

«Гэта даўно ўжо трэба было вырашыць. І людзі ўжо спакойна гэта прынялі, таму што каля траціны, а можа, і палова пэнсіянэраў даўно ўжо зразумелі, што трэба працаваць, і працавалі, не выходзячы на пэнсію. Таму нічога надзвычайнага тут абсалютна няма».

Лукашэнка: Вось кажуць, прыйшлі і арыштавалі, а заўтра прыйдуць па іншых. Ну вядома, прыйдуць!

Лукашэнка выказаўся пра бізнэс-клімат у Беларусі:

«Што ў нашай краіне перашкаджае займацца бізнэсам? Але калі хто-небудзь хоча займацца бізнэсам ва ўласных інтарэсах і так, як ён лічыць патрэбным, ня ўлічваючы наша заканадаўства, тады вам ня месца працы ў Беларусі. Трэба спыніць гэтую спрэчку, нікому яна не патрэбная. Маса бізнэсмэнаў ні на што ня крыўдзіцца. Галоўнае — выплата падаткаў. І можаш спакойна спаць, можаш ня спаць — гэта тваё права. Але аддай тое, што ты павінен аддаць дзяржаве. Вось кажуць, прыйшлі і арыштавалі, а заўтра прыйдуць па іншых. Ну вядома, прыйдуць, калі вы будзеце так працаваць. Калі вы будзеце абдзіраць дзяржаву і не плаціць падаткі. Вось што я патрабую: пакажыце яшчэ адзін факт за выключэньнем выплаты падаткаў, па прычыне якога затрыманы хоць адзін прадпрымальнік або бізнэсмэн. Пакладзіце на стол такія факты — іх няма».

Валер Карбалевіч: Як павысіць эфэктыўнасьць навукі, перайсьці да інавацыйнай вытворчасьці? Правільна. Напісаць яшчэ адну праграму.

Лукашэнка: Мэта — увайсьці ў 30-ку краінаў па ўмовах вядзеньня бізнэсу.

Лукашэнка: моцна залежаць ад аднаго рынку збыту — нельга, гэта прывядзе да бяды

Лукашэнка заявіў, што вельмі важна дывэрсыфікаваць эканоміку, а інакш можа быць бяда.

«Даводзіцца канстатаваць, што на традыцыйных рынках збыту айчыннай прадукцыі, перш за ўсё гэта Расея і Ўкраіна, скараціўся попыт. Мы ня можам проста сядзець і чакаць, калі ён узрасьце. Таму пастаўленая задача па дывэрсыфікацыі беларускага экспарту. Гэтая задача пастаўленая ня сёньня, ня ўчора і не пазаўчора. Мы вельмі дакладна, прабачце за нясьціпласьць, улавілі будучую сытуацыю ... Мы разумелі, што так моцна залежаць ад аднаго рынку збыту — нельга, гэта прывядзе да бяды. Такая тэндэнцыя сёньня вымалёўваецца», — заявіў Лукашэнка.

Валер Карбалевіч: Няма праектаў ня толькі пад кітайскія крэдыты, але ўжо і пад крэдыты Ўсясьветнага банку. Як казаў клясык, «разруха ў галовах».

Лукашэнка: трэба ствараць 50 тысяч новых працоўных месцаў кожны год

Лукашэнка заявіў пра неабходнасьць аптымізаваць колькасьць работнікаў у эканоміцы. Аднак на кожнае скарочанае месца павінна быць створана новае, больш прадукцыйнае. «Калі раптам на МАЗе ці БелАЗе адбываецца аптымізацыя і вызваляецца энная колькасьць работнікаў, то гэтых людзей трэба ўзяць за руку, перавесьці праз дарогу і працаўладкаваць на новым працоўным месцы, а не выкідаць на вуліцу», — падкрэсьліў ён.

«Задача — штогод ствараць 50 тысяч працоўных месцаў. Падкрэсьліваю: усяго толькі 50 тысяч. Праўда, апошнім часам нам усё больш гавораць, што мільён трэба стварыць. Але гэта сьмешна. Для таго каб стварыць мільён працоўных месцаў, трэба мець мільярды даляраў», — заявіў Лукашэнка.