Суд пачаўся 25 студзеня, працягваўся 26 студзеня.
Максім Пякарскі,Вячаслаў Касінераў і Вадзім Жаромскі не прызнаюць сваёй віны, а пацярпелы прадпрымальнік, чый білборд пашкодзілі, адмовіўся ад прэтэнзіяў, бо яму ўжо кампэнсавалі страты ў 2 млн рублёў.
25 студзеня перад пачаткам судовага паседжаньня па справе графіцістаў актывісты Павал Сяргей і Максім Шыцік разгарнулі расьцяжку «Не — палітычным перасьледам» і выкрыквалі: «Мастацтва — не злачынства!». Іх гвалтам вывелі з залі суду, затрымалі і зьбілі. Разам зь імі зьбілі і затрымалі журналіста парталу tut.by Паўла Дабравольскага, які быў за дзьвярыма залі пасяджэньня і пачаў здымаць на відэа, як затрымліваюць актывістаў.
Максіма Шыціка пакаралі штрафам у 45 базавых велічынь (9 450 000 рублёў), Паўла Сяргея — штрафам у 50 базавых велічынь (10 500 000 рублёў). Журналісту Паўлу Дабравольскаму прысудзілі штраф 45 базавых велічынь (9 450 000 беларускіх рублёў). Працэс вяла Марыя Ярохіна.
Працэс пачаўся. Поўная заля. Сярод іншых прыйшоў Анатоль Лябедзька.
Дасьледуюць матэрыялы па справе
Прадстаўнік пракуратуры Сьцяпурка пачаў зачытваць матэрыялы справы з 5-га тому.
Усплыла таямнічая «зброя»
У ходзе вывучэньня дакумэнтаў выявілася, што ў Жаромскага падчас арышту забралі газавы пісталет. Пракурор зачытаў дакумэнт, паводле якога гэты пісталет быў пазьней выключаны са справы і вернуты Жаромскаму. Гэта, відаць, і ёсьць тая «зброя», пра якую заяўляў СК пасьля арышту хлопцаў у жніўні 2015 году, што «яны мянялі адрасы, прозьвішчы, у іх была зброя».
Вывучаюць 6 том справы
Пачалі з пратаколу рэчаў, забраных пасьля ператрусу ў Касінерава. Усяго было забрана 18 пазыцый, у тым ліку адзеньне, рэчы, кампутар. Потым сыстэмны блёк кампутара выключылі са справы. Таксама ў Касінерава было забрана шмат кніг і брашур, якія потым агледзелі, выключылі з матэрыялаў і яму вярнулі.
Пракурор пачаў зачытваць дакумэнты 7-га тому. Яшчэ будуць 8-мы і 9ты. Суд дазволіў у мэтах эканоміі часу зачытваць толькі тыя пратаколы допытаў абвінавачаных, якія супярэчаць іх паказаньням у судзе, і адразу задаваць пытаньні адносна гэтых разыходжаньняў.
Пракурор працытаваў пратакол допыту Касінерава ад 11 жніўня 2015 году, але той заявіў, што такога допыту не магло быць, бо ўпершыню яго дапытвалі 13 жніўня. Зачыталі даведку турэмнага лекара ад 15 жніўня, што Касінераў можа па стане здароя браць удзел у сьледчых дзеяньнях. Касінераў да суду распавядаў, што ў той час ня мог есьці і размаўляць, бо ў яго была зламаная сківіца, што адбылося падчас арышту.
Касінераў расказаў пра ціск пад час допыту
Пра допыт 16 жніўня Касінераў сказаў, што быў у кайданках, на яго ціснулі псыхалягічна, пагражалі, у яго балела зламаная сківіца, ад яго дамагаліся патрэбных паказаньняў. Таму паказаньні ў той дзень цяпер ён называе не адпаведнымі рэчаіснасьці. У прыватнасьці ў частцы, што ён адзін гатаваў лямпачкі для запэцківаньня білбордаў з выявамі міліцыянтаў і рабіў гэта мэтанакіравана.
Пракурор варушыць «брудную бялізну»
Пракурор зачытаў паказаньні Касінерава пра тое, што ў яго ўзьнікла непрыязьнь да міліцыянтаў з-за таго, што ягоны бацька, калі быў міліцыянтам, завёў раман на баку ў той момант, калі маці Касінерава была цяжарная ягоным малодшым братам. Вячаслаў Касінераў, калі пракурор запытаў яго пра праўдзівасьць тых паказаньняў падзякаваў пракурора за тое, што той «пачаў варушыць брудную бялізну іх сям’і».
Зачыталі станоўчыя характарыстыкі Касінерава з БДУ, з музэю, з крамы, дзе ён працаваў. У тым ліку ўчастковы паведаміў, што скаргаў суседзяў на Касінерава не было.
Пачалі вывучаць 8 том. Жаромскі на першых пасьля арышту допытах адмаўляўся даваць паказаньні і загаварыў толькі 20 жніўня, калі віну прызнаў часткова.
Жаромскаму суд дазволіў адказваць седзячы, бо ў яго баліць сьпіна, ён носіць бандаж пасьля шпіталя.
З паказаньняў Жаромскага: віну прызнаю часткова, прызнаю пашкоджаньне маёмасьці, але не хуліганства. Частку запісанага ў пратаколе допыту не прызнаў.
«На мяне ціснулі супрацоўнікі Ўпраўленьня барацьбы з арганізаванай злачыннасьцю, запужвалі, недакладна запісвалі мае словы. Паміж допытамі ўжывалі электрашокер».
Адмаўляе, што бачыў, як Максім Пякарскі фатаграфаваў надпісы, якія яны намалявалі.
З характарыстыкі Жаромскага з крамы, дзе працаваў, — добры, дысцыплінаваны працаўнік. З каледжу, дзе вучыўся, характарыстыка цалкам станоўчая. У тым ліку на Жаромскага ў справе ёсьць характарыстыка зь СІЗА на Валадарскага, у якой сказана, што ўнутранага парадку не парушаў, а больш паведаміць ня могуць з-за непрацягласьці заходжаньня ва ўстанове.