Выдавецтва «Время» выпусьціла кнігі Алексіевіч «Цынкавыя хлопчыкі» (2007), «Чарнобыльская малітва» (2008), «У вайны не жаночы твар» (2008), «Апошнія сьведкі» (2008), «Час сэканд-хэнд» (2013).
Пастарнак павіншаваў жыхароў Беларусі з прысуджэньнем Нобэлеўскай прэміі Сьвятлане Алексіевіч. «Тое, што ў Беларусі ніхто, акрамя „Логвінава“, не выдае кнігі Сьвятланы Алексіевіч, — памылка беларускіх кнігавыдаўцоў, якой мы карыстаемся. Адзначу, эканамічна выдаваць Алексіевіч выгадна. Наогул жа я лічу, што на тое, што надзённае і важнае, павінна хапаць часу і грошай. Нельга скочвацца да прымітыўных кніжак за тры рублі і гаварыць, што людзі добрыя кнігі не купляюць. Мы бачым, што дарагія і якасныя кнігі карыстаюцца попытам», — сказаў выдавец.
Асноўны аптовы партнэр «Времени» ўжо зьвярнуўся ў выдавецтва з просьбай надрукаваць дадатковы наклад кніг Алексіевіч. Ужо ў кастрычніку «Время» выпусьціць усе пяць кніг Алексіевіч накладам 10 тыс. асобнікаў кожная.
«Мы чакалі, што яна атрымае прэмію, не баяліся выпускаць кнігі Сьвятланы Алексіевіч і раней. Цяпер я тым больш упэўнены, што попыт на новыя наклады будзе расьці», —— заявіў Пастарнак.
У выдавецтве «Логвінаў» —— адзіным беларускім, дзе выдаваліся кнігі Алексіевіч у апошнія гады (на беларускай мове «Час сэканд-хэнд»), —— гатовыя да таго, што попыт на аўтара павялічыцца. Дырэктар літаратурнага дому «Логвінаў» Ігар Логвінаў адзначыў, што ў аднайменнай кнігарні кніга «Час сэканд-хэнд» у продажы ёсьць. Выдавецтва будзе імкнуцца задаволіць попыт на кнігу і для іншых кнігарняў.
«Калі кніга будзе перавыдавацца, то на беларускай мове», —— сказаў Логвінаў.
Пра гэта піша агенцтва БелаПАН.
