Прэзыдэнт Украіны Пятро Парашэнка зацьвердзіў новую рэдакцыю ваеннай дактрыны краіны, у якой Расея паказаная як «актуальная ваенная пагроза».
Аб гэтым паведамляецца на афіцыйным сайце ўкраінскага лідэра.
У дакумэнце адзначаецца, што пагрозай для Ўкраіны зьяўляецца ўзброеная агрэсія Расеі ў асобных раёнах Данецкай і Луганскай абласьцей, анэксія Крыму, нарошчваньне войскаў на расейска-ўкраінскай мяжы, а таксама магчымасьць разгортваньня на тэрыторыі Крыму тактычнай ядзернай зброі.
2-га верасьня новую рэдакцыю ваеннай дактрыны Ўкраіны зацьвердзіла Рада нацыянальнай бясьпекі і абароны краіны.
