На прэсавай канфэрэнцыі ў Бруселі Жан-Клод Юнкер заявіў, што Грэцыі ня варта супрацьпастаўляць адну дэмакратыю васямнаццаці іншым у Эўропе, паведамляе ўкраінскае выданьне «Эўрапейская праўда».
«Эгаізм, тактычныя гульні, папулісцкія гульні мелі месца. На карту пастаўлены эўрапейскі дух салідарнасьці і адказнасьці. Гульня адной дэмакратыі супраць 18 іншых — гэта адносіны, ня вартыя вялікай грэцкай нацыі» — сказаў ён.
Паводле словаў Юнкера, ён хацеў бы, каб Эўропа заставалася адзінай.
«Мы ніколі не вылучалі ультыматумаў. Нашай адзінай мэтай было і застаецца дасягненьне справядлівага і збалянсаванага пагадненьня», — адзначыў ён.
Паводле яго слоў, апошнія прапановы крэдытораў грэцкаму ўраду не ўключаюць скарачэньне пэнсіяў і заробкаў.
«Гэта не пакет мераў жорсткай эканоміі. У параўнаньні з папярэдняй прапановай, мы прасілі на 12 мільярдаў эўра менш эканоміі ў найбліжэйшыя гады» — дадаў ён.
Кіраўніца ураду Нямеччыны Ангела Мэркель заклікала эўрапейцаў да гатоўнасьці ісьці на кампраміс у складаных сытуацыях.
«Салідарнасьць і адказнасьць у адносінах паміж краінамі эўразоны — два бакі аднаго мэдаля» — падкрэсьліла яна, выступаючы ў Бэрліне на пасяджэньні прэзыдыюму партыі ХДС, паведамляе «Нямецкая хваля».
«Калі здольнасьць да пошуку кампрамісаў будзе згубленая, то згубленая будзе і Эўропа, — заявіла Меркель. — Агульнаэўрапейская валюта — больш чым проста валюта: яна грунтуецца на ўсеагульным даверы».
Мэркель па-ранейшаму адкрытая для дыялёгу з Атэнамі і гатова сустрэцца з прэм’ер-міністрам Грэцыі Алексісам Цыпрасам, «калі ён гэтага хоча», паведаміў афіцыйны прадстаўнік урада Нямеччыны Штэфэн Зайбэрт.
«Мы заўсёды выступалі за тое, каб Грэцыя засталася ў эўразоне» — падкрэсьліў Зайбэрт, выказаўшы шкадаваньне тым, што грэкі ў аднабаковым парадку перапынілі перамовы з крэдыторамі.
