«Беркутавец» сарваў каску з надпісам «прэса» і пачаў біць па галаве — журналіст «Радіо Свобода»
У Кіеве «Беркут» па-зьверску зьбіў журналістаў Радыё Свабода
Відэаапэратар Ігар Ісхакаў і журналіст Дзьмітро Баркар, якія асьвятлялі падзеі ў Кіеве, атрымалі сур’ёзныя пашкоджаньні ад байцоў «Беркута».
Сёньня ранкам абодвух журналістаў затрымалі на вуліцы Грушэўскага ў Кіеве. Празь некалькі гадзін іх адпусьцілі. У Ігара Ісхакава зламаны нос, падазрэньне на страсеньне мозгу, сінякі на твары і целе, адзеньне ў крыві.
Твар Дзьмітра Баркара таксама ў сіняках, ён моцна зьбіты.
Ігар Ісхакаў 19 студзеня пацярпеў ад разрыву шумавой гранаты на вуліцы Грушэўскага.
Журналісты змаглі зьняць, як байцы «Беркута» страляюць па відэакамэрах, у тым ліку і ў камэру самога Ісхакава.
Падчас затрыманьня зьнікла відэакамэра, зь якой працавалі журналісты Радыё Свабода.
