Варламаў: Мяне паставілі на месца

Радыё Свабода пачынае жывы рэпартаж з прысуду Аляксандру Варламаву.

Аляксандар Варламаў прызнаў сябе вінаватым толькі ў нясплаце падаткаў, а паводле астатніх абвінавачваньняў прасіў суд яго апраўдаць.

Справу Варламава разглядаў суд Ленінскага раёну Менску.

Пад вартай Аляксандар Варламаў ужо больш за 2 гады.

Заключнае паседжаньне суду пачнецца аб 11-й гадзіне.

Прысутных запускаюць у залю.

Заля поўная журналістамі, сваякамі і сябрамі.

Варламаў сядзіць моўчкі, абапіраючыся на мыліцу.

Фота- і відэажурналісты яго здымаюць.

Прыйшоў пракурор Загароўскі.

Адвакат Піваварчык таксама ў залі.

Здымае БТ.

Прыйшла судзьдзя.

Варламава вызваляюць з-пад варты ў залі суду.

Далі пяць гадоў абмежаваньня волі, але залічылі час за кратамі: дзень за два.Такім чынам вызваляюць.

Наклалі грашовыя кампэнсацыі.

Людзі ў залі плачуць

Сястра Варламава Рыма: «Быццам, гэта мяне вызваляюць. Нічога больш не магу сказаць».

Варламаў 2 гады ня мае права займацца кіроўнай дзейнасьцю.

Ён будзе знаходзіцца пад хатнім арыштам пакуль прысуд не пачне дзейнічаць.

Варламаў выйшаў у калідор.

На пытаньне Радыё Свабода, ці будзе ён абскарджваць прысуд завіў, што ня будзе траціць сілы на гэта, бо іх у яго мала.

«Мне трэба навучыцца зноў быць вольным», — заявіў Варламаў.

Сказаў, што адчувае вялікае задавальненьне, што зараз на волі.

Варламаў паўтарыў, што ня лічыць сябе вінаватым.

Яго спыталіся: ці будзе вяртацца ў мадэльны бізнэс?

Адказ: «А хто мяне там чакае? Здаецца, там ўсё схоплена, размеркавана».

«У турме мне такіх прапановаў не паступала», — заявіў Варламаў.

Ён падзякаваў тым, хто ў яго верыў і падтрымліваў, не здрадзіў.

Варламаў сказаў, што фізычна адчувае сябе вельмі дрэнна.

Яму фактычна не давялося два гады хадзіць, ляжаў, толькі падымаўся ў прыбіральню.

«Зараз трэба зноў вучыцца хадзіць», кажа Варламаў.

Варламаў сказаў, што найперш зоймецца здароўем, «бо там, у СІЗА, ня лечаць».

Радыё Свабода: Ці ёсьць у вашай справе палітычны складнік?

Варламаў: Мяне паставілі на месца.

Радыё Свабода: Калі вы былі за кратамі, прагучала вэрсія, што мадэлі з вашага агенцтва мусілі аказваць пэўныя паслугі высокаму начальству, а вы ўспрацівіліся. Такое было?

Варламаў выказаўся ў тым сэнсе, што яму ня варта зараз адказваць такім чынам, каб пагоршыць сваё становішча.

Варламаў будзе знаходзіцца пад падпіскай яшчэ 8 месцаў.

Варламаў падзяліўся сваімі першымі жаданьнямі на волі: схадзіць у царкву, а потым памыцца.

Кавалёва: «Гэты суд — перасьцярога іншым творчым асобам»

Юрыст Антаніна Кавалёва, камэнтуючы Свабодзе прысуд Аляксандру Варламаву, адзначае:

«Мне здаецца, што гэта вельмі жорсткі прысуд асобе, якая шмат гадоў была абласканая ўладай. Гэтай асобе ўдзялялася вялікая ўвага ў мэдыях, ёй выдзяляліся сродкі на правядзеньне шэрагу акцыяў. Чалавек стварыў сабе пэўны імідж, і свайму агенцтву, і фэстывалю, які ён праводзіў. І шкада, што ўсё тое, што Варламаў зрабіў, некуды канула. І, як мне здаецца, не ацэнена па-сапраўднаму.

І вельмі шкада, што цаніць творцаў, цаніць тое, што яны зрабілі для Беларусі, мы пачынаем толькі тады, калі супраць іх ужываюцца рэпрэсіі і чыніцца несправядлівасьць. Тое, што падаецца пра гэты судовы працэс незалежнай прэсай і нават афіцыйнымі тэлеканаламі, выклікае адчуваньне несправядлівасьці. А як паказвае мой досьвед, у людзей заўсёды ёсьць адчуваньне, што добра, а што нядобра, што справядліва, а што несправядліва. І з усяго, што робіцца вакол Варламава, узьнікае адчуваньне несправядлівасьці, адчуваньне таго, што гэты працэс нейкі паказальны.

Мне падаецца, што адбываюцца пэўныя разборкі, падзел сфэраў уплыву. І перасьцярога іншым творчым людзям, каб яны не пераступалі пэўную мяжу».

Гразнова: «Гэта ўрок іншым прадпрымальнікам»

Кіраўніца грамадзкай арганізацыі «Праваабарончы альянс», зарэгістраванай у Літве, Людміла Гразнова называе справу Варламава гучнай:

«Гэта ўрок ня толькі Варламаву, але і іншым прадпрымальнікам, каб яны ведалі сваё месца, каб яны не пашыралі свой бізнэс, каб яны працавалі ня толькі на сябе, але і, умоўна кажучы, на таго дзядзьку. І самае галоўнае, каб яны працавалі, не выходзячы за рамкі нашай аўтарытарнай, у тым ліку і эканамічнай, мадэлі. Таму ўсё ў справе Варламава лягічна і невыпадкова».