Гарадзкі транспарт ходзіць зь перабоямі. У крамы са спазьненьнем завозяцца прадукты. Некаторыя населеныя пункты дагэтуль без электрычнасьці — такія наступствы сьнежнага шторму.
Ураган, які атрымаў ў Эўропе назоў «Хавэр», фактычна спыніў рух транспарту ў Беларусі. На трасах заносы, шматкілямэтровыя коркі, рух абмежаваны. Нацыянальны аэрапорт прыняў адзінкі рэйсаў, дзясяткі адмененыя. Гарадзкі транспарт ходзіць зь перабоямі. У крамы са спазьненьнем завозяцца прадукты. Некаторыя населеныя пункты дагэтуль без электрычнасьці — такія наступствы сьнежнага шторму.
Найбольш пацярпела ад урагану цэнтральная частка краіны, кажа прэсавы сакратар Міністэрства надзвычайных сытуацый Віталь Навіцкі:
«Тэрыторыя Менскай вобласьці, пад’езды да сталіцы, часткова Магілёўская вобласьць. У Гомельскай вобласьці было больш праблем, зьвязаных з праліўнымі дажджамі — працавала тэхніка на адпампоўваньні вады. Мінімальна закранутыя Гарадзенская, Берасьцейская і Віцебская вобласьць».
Амаль суткі была паралізаваная сталіца. Наземны гарадзкі транспарт у пятніцу ўвечары не працаваў зусім, у спальныя раёны людзі вымушаны былі дабірацца пешшу. У гадзіну не спыняліся цягнікі ў мэтро на Кастрычніцкай і Купалаўскай — баяліся цісканіны. У суботу транспарт працуе зь вялікімі перабоямі. Адменены заняткі ў школах, унівэрсытэтах. Адмененыя народныя гуляньні — меркавалася, што ў суботу і нядзелю народ будзе сьвяткаваць Масьленіцу. Яшчэ больш праблем у рэгіёнах.
Апавядае жыхар Плешчаніцаў, што ў Лагойскім раёне, Юры Крывашэй: «У мяне сумёты па вакно, усё замецена сьнегам. Сур’ёзна было раніцай, а вельмі сур’ёзна было ў пятніцу. Рэйсавыя аўтобусы зь Плешчаніцаў адмененыя. Электрычнасьць ёсьць, але часам прападае. У Лагойскім раёне, напрыклад, да 12-й ночы ў пяці населеных пунктах на 100% была адключана электрычнасьць. Напрыклад, у вёсцы Акцябр больш за суткі не было сьвятла. У саміх Плешчаніцах на некаторых вуліцах учора ўвечары аднавілі падачу электраэнэргіі, на некаторых — толькі сёньня раніцай. Ну а дарогі да вёсак ніхто ня чысьціць. Цэнтральныя сядзібы сельсаветаў яшчэ чысьцяць, а далей дабрацца ўжо немагчыма. Неяк трактарамі яшчэ грабуць, а адмысловых машын для ачысткі дарог на вёсках няма».
За мінулыя суткі ў Менску было больш за 160 дарожна-транспартных здарэньняў, абышлося без ахвяраў. «Менсктранс» паведамляе, што 80% прыгарадных аўтобусаў не даходзіць да канцавых пунктаў. Ураганам было абясточана амаль 1700 населеных пунктаў краіны, энэргетыкі працуюць круглыя суткі, праблемы на дарогах застаюцца, кажа прэсавы сакратар МНС Віталь Навіцкі:
«Паводле інфармацыі энэргетыкаў, яшчэ больш за 300 населеных пунктаў застаюцца без электрычнасьці. Таксама на некаторых участках дарог, да прыкладу, каля пасёлку Прывольны, па-ранейшаму не адноўлены рух. Але зараз такіх участкаў 2–3, а ўчора мы вялі гаворку пра 30».
Затор на трасе М4 каля Прывольнага па стане на 11 гадзін, фота МНС
Дагэтуль найбольш складанай зьяўляецца траса М4 Менск—Магілёў, у Чэрвенскім раёне затор з аўтамабіляў расьцягнуўся на 30 кілямэтраў, паведамляе Менскае абласное ўпраўленьне МНС. 10 кілямэтраў складае затор на трасе Менск—Горадня. Коркі ў Дзяржынскім раёне, цяжка дабрацца да прыгараду Менску Гатава.
Практычна ў палоне амаль на суткі апынуліся пасажыры Нацыянальнага аэрапорту «Менск». Да гораду было дабрацца немагчыма, рэйсы адмененыя. У суботу аэрапорт прыняў некалькі самалётаў — маскоўскі, які амаль на суткі затрымаўся ў Гомелі, стамбульскі. Але вылет дзясяткаў міжнароных рэйсаў затрымліваецца на няпэўны час.
У суботу да барацьбы са стыхіяй далучыліся вайскоўцы. Гарадзкія ўлады заклікаюць жыхароў гораду расчысьціць хаця б свае двары. Менчукі, дарэчы, актыўна адгукаюцца: у Каменнай Горцы на ўборку выйшла 65 чалавек толькі з аднаго дома.
Віталь Навіцкі: «МНС зьвяртаецца ў чарговы раз да грамадзянаў зь пераканаўчай просьбай: не выкарыстоўваць асабісты аўтатранспарт. Тым больш, што практычна ўсе выезды зь Менску зараз перакрытыя. І просім паркаваць аўтамабілі так, каб яны не перашкаджалі працы камунальных службаў».
Пад вечар завіруха ў Менску спынілася, ідзе лёгкі сьняжок. Але сыноптыкі папярэджваюць, што чакаецца ўзмацненьне маразоў да мінус 20 градусаў.
Вуліца ў Крупках пасьля шторму
А як вы перажылі «Хавэр»?
Пакідайце у камэнтарах свае ўражаньні і цікавыя гісторыі.
Дасылайце вашыя фатаздымкі й відэасюжэты на rferl.minsk@gmail.com.
