د خیبر پښتونخوا په کواټ (کوهاټ) کې د کمر نړېدو په پېښه کې اووه تنه وژل شوي او يو ژوبل دی.
ځايي پولیسو مشال راډیو ته په استولي یو بیان کې ویلي دي چې دا پېښه د جنورۍ پر ۱۴مه د اباسين پر غاړه د ګمبټ تحصيل په قمر کلي کې شوې ده.
پولیس زياتوي چې د پېښې ښکار شوي د اباسین پر غاړه د سرو زرو په لټون بوخت ول چې کمر ورباندې ونړېد.
بلخوا د ژغورنې او مرستندویه چارو ادارې (رېسکیو ۱۱۲۲) يو ویاند جواد اپرېدي د جنورۍ پر ۱۴مه پر ټولنيزو شبکو په بیان کې ويلي دي چې د اووه کسانو مړي يې ایستلي او يو تن يې په ژوبل حالت کې ژغورلی دی.
ویل کېږي چې په وژل شويو کې شپږ تنه د يوې کورنۍ غړي ول.
د ضلعي انتظامیې پر بندیز سربېره د بېلا بېلا کلیو خلک د اباسین پر غاړه په خاورو کې د سرو زرو او مسو (تانبې) لټون کوي.
