د خيبر د ولسي مشر او پښتون قامي جرګې غړي ملک نصیر احمد کوکيخېل مدافع وکيل وايي چې عدالت د هغه د موکل پرضد په درج شويو اووه مقدمو کې يې ضمانتونه منظور کړي او په پينځو نورو کې لا پاتې دي چې نوموړی يې د ترلاسه کولو هڅه کوي.
شاه محمد د فبرورۍ پر څلورمه مشال راډيو ته وويل چې د ملک نصير کوکيخېل پرضد د خيبر پښتونخوا د بېلا بېلو ضلعو ترڅنګ د بلوچستان په خضدار کې هم مقدمه جوړه شوې ده.
هغه زياته کړه چې په يو درخواست کې يې له پېښور های کورټ څخه غوښتي چې پر موکل يې د يوې واقعې یا پېښې لپاره تر يوې زياتې مقدمې بايد ختم کړي.
بلخوا د کوکيخېلو د قامي کمېټۍ مشر ملک برکت اپرېدي د فبرورۍ پر څلورمه مشال راډيو ته وويل، پلان لري چې د فبرورۍ پر نهمه په جمرود کې په يوه احتجاجي غونډه کې د ملک نصير کوکيخېل د خوشې کولو لپاره غږ پورته کړي.
د خيبر پوليسو ملک نصير کوکيخېل د ۲۰۲۴ز د ډېسېمبر پر ۲۴مه د جمرود په شاکڅ کې د لېويزو له دفتره ګرفتار کړی وو.
پر هغه تور دی چې د ۲۰۲۴ز په اګست کې يې د تيرا راجګال کډوالو په احتجاجي پرلت کې د رياست ضد ويناوې کړې وې او وروسته يې د همهغه کال په اکتوبر مياشت کې د پښتون ژغورنې غورځنګ (پي ټي اېم) په کوربه توب د وربلل شوې پښتون قامي جرګې لپاره په جمرود کې د کوکيخېلو مشترکه ځمکه ورکړې وه.
خو ملک نصير کوکيخېل ويلي دي چې د تيرا د کډوالو او په ټوله کې د پښتنو پر سيمو يې د امن او د هغوی د حقونو لپاره د سوله ييز غږ پورته کولو خپل قانوني او اييني حق کارولی دی او له هر ډول تشدد او تاوتريخوالي څخه يې ډډه کړې ده.
