د طالبانو حکومت وايي، په کابل کې د یو مساپر لېږدوونکي بس اوښتو په پېښه کې لږ تر لږه ۲۵ تنه وژل شوي دي.
د طالبانو د کورنیو چارو وزارت ویاند عبدالمتین قانع د اسوشيېټېډ پرېس اژانس په ګډون رسنیو ته ویلي، پېښه د اګست پر ۲۷مه سهار وختي د کابل په ارغندي سیمه کې شوې.
دی وايي، بس د افغانستان له جنوبه د کابل پر لوري روان وو او زیاتره مساپر پکې د هېلمند او کندهار ول.
قانع اسوشيېټېډ پرېس اژانس ته ویلي، پېښه د ډرېور د بې احتیاطۍ له وجې شوې چې پکې ۲۷ تنه ژوبل شوي هم دي.
په افغانستان کې وخت په وخت مرګونې ټرافیکي پېښې کېږي. د اګست پر ۱۹مه د هرات له اسلام کلا بندر سره نېږدې په ګذره ولسوالۍ کې له ایرانه د ستنو شویو کډوالو د بس، د تېلو په بیرلو د بار لارۍ او یو موټرسایکل ترمینځ په ټکر کې د ۱۹ ماشومانو په ګډون ۸۰ تنه ووژل شول.
د ټکر له وجې بس او لارۍ اور واخیست او د طالبانو چارواکو ویلي ول چې ټول کسان بشپړ سوځېدلي ول چې پېژندګلوي یې نه شوه کېدای.
د طالبانو اطلاعاتي او فرهنګي چارو مشر احمد الله متقي رسنیو ته ویلي ول چې د پېښې ډېری قربانیان د کابل، پروان، کاپیسا، غزني او بامیان ولایتونو اوسېدونکي ول.
چارواکو زیاته کړې وه چې د پېښې لامل د بس تېز رفتاري او د ډرېور بې احتیاطي وه.
په افغانستان کې ټرافیکي پېښې اکثر د قوانینو نه رعایت او د ډرېورانو بې احتیاطۍ، د سړکونو خرابوالي، د خورا پخوانیو یا د ښي لاسو ګاډو استعمال او پر وخت د ګاډو معاینې او مرمت نه کولو له کبله پېښېږي چې مرګژوبله اړوي.
