په لیبیا کې په سختو سېلابونو کې د وژل شویو کسانو شمېر ۱۱،۵۰۰ ته نېږدې شوی دی.
د ملګرو ملتونو د بشري مرستو همغږۍ چارو دفتر (اوچا) د سېپټېمبر پر ۱۶مه وویل چې یوازې په ختیز درنه ښار کې د وژل شویو شمېر ۱۱،۳۰۰ ته رسېدلی دی.
رویټرز خبري اژانس وايي، د دې ترڅنګ سېلابونو د لیبیا په نورو برخو کې شاوخوا ۱۷۰ تنه وژلي دي.
د سېپټېمبر پر ۱۰مه تر سمندري طوفان وروسته په سیند کې د اوبو سطح لوړه شوه چې له کبله یې دوه بندونه (ډیمونه) مات شول او لوی سېلاب د درنه ښار یوه لویه برخه په کنډوالو بدله کړه او ګڼ خلک یې د مدترانې یا روم سمندرګي ته لاهو کړل.
ملګري ملتونه وايي، تر سېلاب وروسته څه باندې ۱۰،۰۰۰ کسان لا هم ورک دي چې د لټون هڅې یې دوام لري.
د سختو سېلابونو له کبله په هغه سیمه کې تر ۴۰،۰۰۰ زیات کسان بې کوره شوي هم دي.
د فرانسې خبري اژانس د سېپټېمبر پر ۱۵مه ویلي ول چې د درنه ښار له خټو څخه په ډکو کوڅو او لارو کې په سلګونو جسدونه تر ودانیو لاندې ښخ شوي دي او غم ځپلي خلک ورپسې ویجاړې ودانۍ لټوي.
د ملګرو ملتونو په وینا، په ځینو ځایونو کې خیریه ادارو ژغورندویه او مرستندویه چارو ته دوام ورکړی دی خو نړیوالو مرستو ته "شدیده اړتیا" ده.
درنه د لیبیا په ختیځ کې پروت ساحلي ښار دی چې ابادي یې ۸۹،۰۰۰ ښوول کېږي او هلته تر طوفان وروسته چې په سیند کې د اوبو کچه لوړه شوه نو دوه بندونه (ډیمونه) یې مات کړل او د ښار لویه برخه یې لاندې کړه.
په ۲۰۱۱ز کال کې د اوږدمهاله واکمن معمر قذافي پرضد پاڅون پیل شو چې وروسته یې د ناټو په مرسته نوموړی له واکه لیرې کړ او و یې واژه.
له هغه وخت راهیسې لیبیا د کورنۍ جګړې او تاوتریخوالي ښکار ده او انتظامي جوړښت یې اغېزمن شوی دی.
په لیبیا کې داراز د واک پر سر د لانجو او اختلافاتو له کبله سېلاب ځپلو سیمو ته د نړیوالو مرستو رسېدل لا ګران شوي دي.
