د شمالي وزیرستان د داوړو ولس پر حکومت غږ کړی دی چې د وسلوالو پر ضد د عملیاتو پر مهال دې د ولسي خلکو خوندیتوب په پام کې ونیسي.
د داوړو د ټولو ښاخونو غړو د فبرورۍ پر پینځمه په میرلي کې د امنیت په اړه د جرګې پر مهال وویل، که د وسلوالو پر ضد په عملیاتو کې ولسي وګړو ته مرګژوبله واوښته نو په پراخ احتجاج لاس پورې کوي.
د حسوخېلو یو مشر او د عوامي نیشنل ګوند غړي ملک نثار علي خان مشال راډیو ته وویل چې دا ورته نور د منلو نه ده چې حکومت به عملیات کوي او پکې به ولسي کسان په نخښه کېږي. "که حکومت د ولسي خلکو امنیت ته پام و نه کړ نو میرلي ته راغلې څلور واړه لارې به د احتجاج په توګه وتړو او بیا به دا لارې تر هغې تړلې وي چې موږ ته د سر او مال د خوندیتوب ضمانت نه وي راکړل شوی."
داوړو د ولسي وګړو د خوندیتوب لپاره دا غږ تر هغې وروسته پورته کړی دی چې څو ورځې وړاندې په حیدرخېلو کې یو ماشوم د هاوان د توغندي د لګېدو له وجې ووژل شو.
د داوړو مشران وايي، د پاکستان امنیتي ځواکونو په وروستیو کې د وسلوالو پر ضد ډرون بریدونه پیل کړي دي چې پکې ولسي خلکو ته هم مرګژوبله او مالي زیان رسي.
د میرلي اوسېدونکو مشال راډیو ته وویل، ځینو وسلوالو هم د فبرورۍ پر پینځمه په لاوډسپیکرونو اعلان وکړ چې نور به په میرلي کې بریدونه نه کوي. خو هلته فعالې تحریک طالبان پاکستان او حافظ ګل بهادر ډلو لا په دې اړه رسماً څه نه دي ویلي.
بلخوا په میرامشا کې پوځي او د میرلي ضلعي انتظامي چارواکو د فبرورۍ پر پینځمه نېټه ناوخته مشال راډیو ته وویل چې د امنیت لپاره یې د وسلوالو پر ضد کاروایانې تېزې کړې دي او هڅه کوي چې پکې عامو خلکو ته زیان و نه رسي.
