د سوات په بحرین کې په یوه ټرافیکي پېښه کې د مدرسې ۱۱ زده کوونکي ژوبل شوي چې پکې د دوو حالت مرګونی دی.
د مرستندویه او ژغورنې چارو ادارې (رېسکیو ۱۱۲۲) ویاند نیاز علي مشال راډیو ته وویل چې پېښه د جولای پر اوومه په کیدام سیمه کې شوې.
دی وايي، زده کوونکي د کالام اوسېدونکي دي چې په سوزوکي کې د بټخېلې له مدرسې کور ته روان ول.
د علي په خبره، ګاډی د تېز رفتارۍ له وجې واوښت چې پکې سپاره ماشومان ژوبل شول.
د ده په خبره، د زده کوونکو عمرونه له ۱۰ څخه تر ۱۶ کلونو پورې دي چې اته یې د بحرین او درې سخت ټپي ماشومان د مدین روغتون ته لېږدول شوي دي.
په پاکستان کې ټرافیکي پېښې زياتره وخت د قوانینو نه عملي کېدو، د سړکونو د خرابوالي، د ډرېورانو د بې احتیاطۍ او د هغوی د سمې روزنې نه کېدو او پر ټاکلي وخت د ګاډو د مرمت او معاینې نه کولو له وجې کېږي.
د دې ترڅنګ په ځینو وړو ښارونو او کلیوالو سیمو کې د ټرافیک کنټرول نظام کمزوری دی چې د حادثو مخه نیول ګرانوي. داراز، په ګاډو کې له اندازې زیات بار لېږدول یې هم کله نا کله توازن خرابوي او د پېښو ښکار کېږي.
د همدې له کبله په خیبر پښتونخوا او د پاکستان په نورو برخو کې وخت په وخت ټرافیکي پېښې خلکو ته ځاني او مالي تاوانونه اړوي.
د جون پر ۲۰مه د خیبر پښتونخوا په کوهستان کې په ټرافیکي پېښه کې دوه تنه ووژل او دوه ژوبل شول.
تر دې مخکې د مې پر لومړۍ نېټه په کوز کوهستان کې ټرافیکي پېښې د یوې کورنۍ اته غړي ووژل. داراز، د اپرېل پر ۱۵مه د خیبر پښتونخوا په کرک کې په یوه ټرافیکي پېښه کې ۱۰ کسان وژل شوي او نهه ژوبل شوي ول.
