د عوامي نیشنل ګوند مخکښې سیاستوالې او د اطلاعاتو پخوانۍ صوبايي سېکرټرې ثمر هارون بلور په مسلم لیګ (ن) د ورګډېدو اعلان کړی دی.
هغې د جولای پر نهمه له وزیراعظم شهباز شریف سره د هغه په دفتر کې ولیدل. په غونډه کې د واکمن مسلم لیګ (ن) یوشمېر نور لوړپوړي سیاستوالان هم موجود ول.
د وزیراعظم دفتر تر غونډې وروسته په بیان کې وویل، شریف بلور ته په ګوند په ورشاملېدو ښه راغلاست ووایه او زیاته یې کړه چې د هغې دا اقدام به په خیبر پښتونخوا کې د مسلم لیګ (ن) دریځ پیاوړی کړي.
وروسته بلور په خپلو خبرو کې وویل، غواړي "خیبر پښتونخوا هم د وفاق او پنجاب په څېر د پرمختګ پر لاره روانه شي."
د مسلم لیګ (ن) یو بل سیاستوال زاهد خان، چې تر شاوخوا څلورو لسیزو پورې د عوامي نیشنل ګوند مخکښ سیاستوال او مرکزي ویاند وو، له خبریالانو سره په خبرو کې تایید کړه چې ګوند یې پرېکړه کړې چې هغه په قامي اسمبلۍ کې د ښځو پر ځانګړې څوکۍ منتخبه کړي.
له عوامي نیشنل ګونده د ثمر بلور بېلېدل یو خورا مهم پرمختګ بلل کېږي ځکه چې د هغې کورنۍ له لسیزو راهیسې د ګوند له تر ټولو پیاوړو ملګرو یوه وه او د پېښور په سیاسي منظر کې ژوره ریښه لري.
بلور له ۲۰۱۸ز کال څخه تر ۲۰۲۳ز کال پورې د خیبر پښتونخوا په اسمبلۍ کې د ګوند استازې وه.
د بلور مېړه هارون بلور د عوامي نیشنل ګوند یو مشر وو چې د ۲۰۱۸ز کال د جولای پر ۱۰مه په پېښور کې د انتخاباتي غونډې پر مهال په ځانمرګي برید کې ووژل شو.
داراز، د هارون بلور پلار او د هغې خسر بشیر احمد بلور، چې د عوامي نیشنل ګوند په اېتلافي حکومت کې لوړپوړی (سینییر) وزیر وو، په ۲۰۱۲ز کال کې په پېښور کې په حمله کې وژل شوی وو.
د عوامي نیشنل ګوند مشر سېنېټر اېمل ولي خان پر خپله رسمي فېسبوک پاڼه په بیان کې ویلي دي چې د ثمر بلور پرېکړې "نه دی حیران کړی" ځکه چې د ګوند غړو وار له مخه خبر کړی وو.
