د افغانستان د کرکټ ملي لوبډلې د اتلانو جام (چمپیینز ټرافۍ) په سیالۍ کې اسټرالیا ته د ۲۷۴ منډو هدف ورکړی دی.
د لاهور په قذافي لوبغالي کې د فبرورۍ ۲۸مې سیالي د کابل پر وخت د ماسپښین پر یوه نیمه او د پېښور پر دوو بجو پیل شوه. افغانستان د لوبې پچه وګټله او لومړی یې توپوهنه غوره کړه.
د افغانستان رحمان الله ګربز په لومړي اوور کې بې له منډې کولو وسوځېد خو ابراهیم ځدراڼ او صدیق الله اتل بیټېنګ ته دوام ورکړ. ځدراڼ ۲۲ منډې وکړې او وسوځېد او بیا رحمت شاه هم ورپسې ژر وسوځېد. خو اتل او حشمت الله شهیدي توپوهنه روانه وساتله.
اتل په ۸۵ او شهیدي په ۲۰ منډو وسوځېد او بیا محمد نبي د منډې اخیستو پر مهال اوټ شو. وروسته عظمت الله عمرزي له ګلبدین نایب او راشد خان سره بیټېنګ ته دوام ورکړ. نایب په څلورو او راشد خان په ۱۹ منډو وسوځېد.
عظمت الله عمرزي ۶۷ منډې وکړې. د افغانستان د کرکټ ملي لوبډله په ټاکلیو ۵۰ اوورونو کې په ۲۷۳ منډو وسوځېده.
د اسټرالیا بېن ډوارشس درې، سپېنسر جانسن او ایډم زیمپا دوه، دوه او نیتن ایلس او ګلېن میکسوېل یوه، یوه وېکټه واخیسته.
په لاهور کې د فبرورۍ له ۲۷مې راهیسې په وقفې، وقفې باران ورېدلی او د جمعې پر ورځ هم په ماښام کې د باران لږ امکان شته چې د لوبې د ځنډولو اندېښنې یې پیدا کړې دي.
تر دې یوه ورځ مخکې د راولپېنډۍ په لوبغالي کې د پاکستان او بنګلادېش د کرکټ د ملي لوبډلو ترمینځ د باران له وجې لغوه شوه او دواړو لوبډلو یوه، یوه نمره (پواینټ) ترلاسه کړه.
پاکستان او بنګلادېش تر دې وړاندې په اتلانو جام کې خپلې دواړه سیالۍ بایللې وې او په دې توګه له نیمه پایلوبې پاتې شوي دي.
د فبرورۍ پر ۲۶مه افغانستان د لاهور په قذافي لوبغالي کې انګلستان (انګلینډ) ته په اتو منډو په ماتې ورکولو نیمه پایلوبې ته د تګ چانس ژوندی کړ. البته نیمه پایلوبې ته د رسېدو لپاره باید افغانستان اسټرالیا ته ماتې ورکړي.
ټاکل شوې چې جنوبي افریقا او انګلستان د مارچ پر لومړۍ د کراچۍ په ملي لوبغالي کې یو بل ته مخامخ شي.
د اتلانو جام په سیالیو کې اته غوره لوبډلې برخه اخلي چې ورڅخه یې پاکستان، بنګلادېش، هند او نیو زیلینډ په الف او افغانستان، اسټرالیا، انګلستان او جنوبي افریقا په ب ګروپ کې دي.
د فبرورۍ پر ۱۹مه پيل شوې دا سیالۍ په پاکستان او دوبۍ کې کېږي چې نيو زيلينډ او هند پکې خپلې لومړۍ دوه سیالۍ ګټلې او نيمه پايلوبې (سیمي فاینل) ته رسېدلي دي.
د اتلانو جام د سیاليو پايلوبه یا فاینل به د مارچ پر نهمه کېږي.
