د خیبر پښتونخوا په بنو کې امنیتي چارواکو دعوه کړې چې د وسله والو د يو قومندان په ګډون یې ۵ وسلوال وژلي دي.
په بنو کې د پولیسو د احمدزی سب ډوېژن تاڼې چارواکو د دیسمبر پر ۲۱مه رسنیو ته په استولي بیان کې دعوه کړې چې تېره شپه د استخباراتي معلوماتو پر اساس تشویو عملیاتو کې یې ۵ وسلوال وژلي دي. پولیسو دعوه کړې چې په وژل شویو کې د کمانډر حاضر په نوم د وسلوالو یو قومندان هم دی. خو په بیان کې دا نه دي راغلي چې دا وسلوال د کومې ډلې وو او نه یې د وژل شوو مړي رسنیو یا خپلوانو ته ښوولي دي.
مشال رېډیو د دې دعوې تصدیق نه شي کولای او نه هم تر اوسه د دې پېښې په اړه کومې وسلوالې ډلې څه ویلي دي.
بل پلو په جانیخېلو کې د ځايي خلکو په وینا، د دیسمبر ۲۰مې په شپه هلته پر یو کور د هاوان مرمۍ لګېدو په پېښه کې د دريو ښځو په ګډون پینځه تنه ټپيان شوي دي. دا کور د عمران وزیر دی چې د ملي جمهوري غورځنګ يو سیاسي فعال دی. نوموړي مشال راډيو ته وويل چې د وسله والو او پوځ ترمنځ د نښتې په وخت یې پر کور ګولۍ لګېدلې چې پکې د هغه د کورنۍ ۳ ښځې او ۲ نارينه ژوبل شوي دي.
له تېرو څلورو کلونو راهیسې په خیبر پښتونخوا کې ناامني، وسلوال بریدونه او له امنیتي ځواکونو او پولیسو سره د وسلوالو نښتې خورا زیاتې شوې دي.
له دې سره په تېرو کلونو کې د صوبې په جنوبي ضلعو او قبايلي سيمو کې د وسلوالو پرضد پر ولسي وګړو او کورونو ډرون بريدونه او د هاوان مرميو (مارټر ګولیو) لسګونه بریدونه شوي چې پکې اکثر مرګژوبله اوړي. د دیسمبر پر ۱۳مه د بنو په مامندخېلو (مهمندخېلو) کې پر یو دوکان د پوځ په ډرون برید کې د یوې وسلوالې ډلې قومندان او درې ماشومان ووژل شول.
د هغو ضلعو اوسېدونکي اکثر د حملو تور د پاکستان پر پوځ پورې کوي. خو پوځ ټینګار کوي چې د عملیاتو پر مهال د ولسي وګړو خوندیتوب ته پوره پام کوي. پوځ او د خیبر پښتونخوا حکومت وايي، په صوبه کې امنیت ته ژمن دي او د دې لپاره یې د وسلوالو پرضد هدفي عملیاتو ته دوام ورکړی دی.
