د پاکستان د بهرنیو چارو وزارت وايي، په افغانستان کې د طالبانو له حکومت سره د اوربند دوام ته ډېرې هیلې نه لري ځکه چې د دوی په وینا د افغانستان له خاورې پر دوی د ترهګرۍ بریدونه دوام لري.
د پاکستان د بهرنیو چارو د وزارت ویاند طاهر اندرابي د نومبر پر ۲۸مه په اسلام اباد کې په اوونیزه خبري غونډه کې وویل، اوربند په دې موخه ترسره شوی وو چې د افغانستان له خاورې د ترهګریزو بریدونو مخنیوی وشي خو هغه هدف نه دی ترلاسه شوی.
نوموړي وویل، "له اوربند وروسته ډېر بریدونه وشول نو د دې مانا دا ده چې اوربند نه دی ټینګ شوی. د اوربند مقصد دا وو چې په پاکستان کې دننه د تحریک طالبان پاکستان او نورو وسلوالو ډلو د بریدونو مخه ونیول شي. نو که افغان وګړي په اسلام اباد او نورو ځایونو کې بریدونه کوي نو بیا موږ د اوربند په اړه ډېر خوشبینه نه شو پاتې کېدای."
د نوموړي په وینا په افغانستان کې د طالبانو له حکومت سره د دوی اوربند هغسې دودیزه یا روایتي اوربند بڼه نه لرله لکه د دوو په جنګ کې د ښکېلو هېوادونو ترمینځ چې وي.
طاهر اندرابي دا څرګندونې د یوې خبریالې د هغې پوښتنې په ځواب کې کولې چې ترېنه یې وپوښتل، ایا د افغان طالبانو د حکومت او د دوی ترمینځ اوربند اوس هم په خپل حال دی او کنه؟
تر دې وړاندې د نومبر د ۲۴مې او ۲۵مې په منځنۍ شپه د افغانستان پر درو ولایتونو خوست، کونړ او پکتیکا په بمبارۍ کې د ۹ ماشومانو په ګډون تر لسو ډېر کسان ووژل شول.
د طالبانو حکومت هغه بمباري د پاکستان کار وباله او ویې ویل چې په مناسب وخت کې به مناسب ځواب ورکړي خو پاکستان وویل چې دوی بمباري نه ده کړې.
خو اوس د پاکستان د بهرنیو چارو وزارت ویاند طاهر اندرابي زیاته کړه چې هېواد یې هر ډول امنیتي چېلنجونو ځواب ویلو ته اماده دی.
اسلام اباد په افغانستان کې د طالبانو پر حکومت په وار وار تور پورې کړی چې د تحریک طالبان پاکستان (ټي ټي پي) په ګډون یې نورو وسلوالو ډلو ته پټنځایونه ورکړي او ورڅخه یې د ټي ټي پي د وسلوالو د ورسپارلو غوښتنه هم کړې ده.
خو د طالبانو حکومت وایی چې د پاکستان په شمول هيڅ ګاونډي هېواد ته د ضرر پېښولو او ستونزو جوړولو اراده نه لري، او نه هم د افغانستان خاوره د کوم بل هېواد پرضد کارول کېږي. خپله ټي ټي پي هم وايي چې وسلوال یې په پاکستان کې دي او په بل هېواد کې پټنځایونو ته اړتیا نه لري.
