د پاکستان د بهرنیو چارو وزارت وايي، د ترکیې د وزیرانو یو پلاوی دا مهال په اسلام اباد کې دی او له لوړپوړو چارواکو سره پر بېلابېلو مسایلو خبرې کوي.
د ترکیې د بهرنیو چارو وزیر حقان فیضان او د دفاع وزیر یاشر ګولر د جولای په نهمه اسلام اباد ته ورسېدل.
د پاکستان د بهرنیو چارو د وزارت د جولای پر نهمه په بیان کې ویلي، "دا سفر د ترکیې او پاکستان ترمینځ د ورورګلوۍ اړیکې ښکاره کوي چې پر ګډو ارزښتونو، متقابل درناوي او د دوستۍ پر اوږد تاریخ ولاړې دي."
پاکستاني چارواکي وايي، د ترکیې د بهرنیو چارو وزیر حقان فیضان او د دفاع وزیر یاشر ګولر له وزیراعظم شهباز شریف، د بهرنیو چارو له وزیر اسحاق ډار او د پوځ له مشر فیلډ مارشل سید عاصم منیر سره ګوري.
اټکل کېږي چې د ترکیې پلاوی د دوه اړخیزې دفاعي همکارۍ د پیاوړتیا په اړه له پاکستاني چارواکو سره خبرې وکړي.
