د اوکراین ولسمشر وولوديمیر زېلېنسکي ویلي چې د هغه هېواد په صنعتي ښار کریويي ریه کې د روسیې د توغنديو په برید کې لږ تر لږه ۱۸ کسان وژل شوي دي.
نوموړي زياته کړې چې د اپرېل پر څلورمه پر استوګنيزې سيمې شوي هغه بريد کې په وژل شويو کسانو کې يې نيمايي ماشومان دي.
د اوکرایین د کورنیو چارو وزیر ایهور کلیمېنکو ویلي چې په هغه برید کې له ۵۰ زيات کسان ژوبل شوي دي چې د ځينو روغتيايي وضع د اندېښنې وړه ده.
کریويي ریه د زېلېنسکي پلرنی ښار دی او نوموړی همهلته زېږېدلی دی.
د دنیپرو پېتروفسک سیمې والي سرهي لیساک ویلي چې دا برید په روان کال کې په اوکراين کې پر ولسي وګړيو يو تر ټولو خونړی وو.
دا بريد تر هغه وروسته شوی چې د اوکراينيو چارواکو په وينا، د اپرېل پر درېیمه شپې مهال پر ختیز خارکیف ښار د روسیې په "لوی برید" کې پينځه تنه وژل شوي او له ۳۵ زيات ژوبل شوي ول.
چارواکي زياتوي، روسیې پر رهایشي ودانیو په هغو بریدونو کې لسګونه ډرون الوتکې هم وکارولې.
