د امريکا ولسمشر ډانلډ ټرمپ ويلي هغه پلان لري چې د پانګونې د يو تړون لاسليکولو لپاره په مې میاشت کې سعودي عرب ته سفر وکړي.
نوموړي د مارچ پر ۳۱مه په سپينه ماڼۍ کې خبريالانو ته وويل "کېدای شي [دا سفر] راتلونکې مياشت (مې) وي، يا شايد لږ وروسته."
دا به د ټرمپ د دويمې ولسمشريزې دورې لومړی بهرنی سفر وي. داراز پلان شوې چې هغه به قطر او متحده عربي اماراتو ته هم ولاړ شي.
رويټرز او اکسيس اژانسونو د امريکايي سرچينو په حواله راپور ورکړی دی چې د ولسمشر په حيث د دويم ځل لپاره تر منتخب کېدو وروسته د مې مياشتې مينځ د ټرمپ د لومړي بهرني سفر لپاره د ممکنه نېټې په توګه غوره شوی دی.
تر دې وړاندې، د مارچ پر شپږمه ټرمپ ويلي ول چې هغه به په پسرلي کې سعودي عربستان ته سفر وکړي. هغه په سپينه ماڼۍ کې دا خبره تر هغه وروسته خبريالانو ته وکړه چې ریاض موافقه وکړه چې په راتلونکو څلورو کلونو کې به له امریکایي شرکتونو سره یو ټريليون (کرب) ډالره پانګونه وکړي.
ټرمپ هغه مهال وويل "هغوی شتمن شوي، موږ ټول زاړه شوي یو. نو ما ورته وویل، زه به درشم که تاسو د څلورو کلونو په موده کې یو ټريليون ډالر امریکایي شرکتونو ته ورکړئ."
ټرمپ زیاته کړه "هغوی دې ته موافق شوي، نو زه به هلته لاړ شم. ښایي د راتلونکې یوې نیمې میاشتې په ترڅ کې."
نوموړي د سپینې ماڼۍ خبریالانو ته وویل چې سعودي عربستان د هغه په لومړنۍ ولسمشريزه دوره کې هم په امریکایي شرکتونو کې ۴۵۰ میلیارده (ارب) ډالره پانګونه کړې وه.
ولسمشر ټرمپ په ۲۰۱۷ز کال کې هم خپل لومړی بهرنی سفر سعودي عربستان ته کړی وو.
سعودي ته د ټرمپ د سفر پلانونه داسې مهال جوړېږي چې د امریکا حکومت هڅه کوي چې په غزه کې اوربند بېرته ټینګ کړي او حماس ډله دې ته اړ باسي چې د اسراییل نور یرغمل خوشې کړي.
امريکا او اروپا حماس ترهګره ډله ګرځولې ده.
امريکايي سرچينو ويلي چې د ټرمپ د سفر تمرکز به د بهرنیو پانګونو، له خليجي هېوادونو سره د اړیکو پراخولو او په منځني ختیځ کې د کړکېچونو پر ختمولو وي.
