د روسیې د لویې څارنوالۍ دفتر د مارچ پر ۳۱مه د هغه هېواد له ستر عدالت (سپريم کورټ) څخه غوښتي چې د افغان طالبانو پر فعالیتونو لګول شوی بندیز دې ليرې کړي.
تر دې وړاندې، د روسیې د بهرنیو چارو او عدلیې وزارتونو تېره اوونۍ له ولسمشر ولادیمیر پوتین څخه په یوه لیک کې غوښتنه کړې وه چې طالبان باید د روسیې د ترهکرو ډلو له نوملړه څخه وایستل شي.
پوتين د ۲۰۲۴ز کال په جولای کې ويلي ول چې په افغانستان کې د طالبانو تحريک د ترهګرۍ پر وړاندې په جګړه کې يو اتحادي ګڼي.
روسیې په ۲۰۰۳ز کال کې افغان طالبان د خپل هېواد د ترهګرو ډلو په نوملړ کې شامل کړل.
طالبانو د ۲۰۲۱ز کال په اګست کې په افغانستان کې حکومت نیولی. تر هغه وروسته ورسره روسیه په کرار کرار اړیکې جوړوي.
د نړۍ هېڅ هېواد تر اوسه د طالبانو حکومت په رسمیت نه دی پېژندلی البته د مسکو په شمول یې ځينو پلازمېنو کې سفیران منل شوي دي.
