د اوکراین ولسمشر ولودویمير زېلېنسکي د مارچ پر ۱۱مه د سعودي عرب له وليعهد محمد بن سلمان سره لیده کاته کړي دي.
ولسمشر زېلېنسکي له محمد بن سلمان سره پر داسې وخت ملاقات کړی چې د اوکراین او امریکا د چارواکو ترمنځ د مارچ پر ۱۱مه د سعودي عرب په جده کې مهمې خبرې پيليږي.
واشنګټن تمه لري چې دا خبرې به له اوکراين سره د روسیې د جګړې په ختمولو کې غټ پرمختګ رامنځته کړي.
د سعودي عرب سرکاري رسنۍ وايي چې په جده کې د اوکراين له ولسمشر سره په غونډه کې وليعهد محمد بن سلمان له هغو نړيوال هڅو سره د خپل هېواد د ملاتړ هوډ تکرار کړ چې هدف يې د اوکراين شخړه حلول او امن پرځای کول دي.
تر دې وړاندې اوکراين د مارچ ۱۰مې په شپه پر داسې مهال پر مسکو سلګونه ډرون بریدونه کړې چې د مارچ پر ۱۱مه په سعودي عرب کې امريکايي او اوکرايني ډيپلوماتان د جګړې ختمولو لپاره د کوربه هېواد له چارواکو سره ګوري.
د مسکو ګورنر ايندری ووروبايوف د مارچ پر ۱۱مه، وويل چې د استوګنې پر سيمو شويو هغو حملو کې يو کس وژل شوی او ۳ ژوبل دي.
بلخوا د روسیې دفاع وزارت ويلي چې د اوکراين لخوا ورغليوو ډرون الوتکو کې یې ۳۳۷ ویشتلي او غورځولي دي.
په همدې حال کې د مارچ پر ۱۱مه په جده کې لوړوپوړي امريکايي او اوکرايني چارواکي د سعودي عرب له چارواکو سره ګوري. د دې ملاقاتونو مقصد د اوکراين جګړې ختمولو لپاره خبرې اترې کول دي.
په اوکراین کې د درې کلنې جګړې د ختمولو لپاره دا خبرې به د امریکا او اوکراین د چارواکو ترمینځ له هغې وروسته لومړنۍ لیدنه وي چې په سپینه ماڼۍ کې د امريکايې ولسمشر ډانلډ ټرمپ او د هغه اوکراييني سيال وولودیمير زېلېنسکي ترمینځ بې سارې لفظي شخړه وشوه.
