د پښتو شاعر او ليکوال سید اسرارالرحمان چې ادبي نوم يې اسرار د طورو وو، د فبرورۍ پر ۱۸مه د ۸۶ کلونو په عمر کې ومړ.
شاعر او ليکوال طيب خان چې د اسرار د طورو په جنازه کې يې ګډون کړی دی، مشال رېډيو ته وويل چې د هغه جنازه نن (فبرورۍ ۱۸مه) په مردان کې په طورو کلي کې وشوه.
نوموړي زیاته کړه چې اسرار د طورو دا مهال په اوسنیو ليکوالانو کې تر ټولو مشر وو.
اسرار د طورو په ۱۹۳۹ زکال د سېپټېمبر پر ۱۵مه د مردان په طورو کلي کې د مشهور ديني عالم او خدايي خدمتګارمولانا محمد عنايت الله کره زېږدلی وو ۔ هغه د مشهور شاعر او ليکوال م ر شفق مشر ورور وو۔
هغه د ژوند په وروستيو کلونو کې خپله شاعري "لاله زار د پرهرونو" په نوم چاپ کړه ۔ د هغه په نورو اثارو کې "امام اعظم"، د قران شريف د ايتونو شمير" ، د ماشومانو د پاره منظومې کيسې "زما کتاب"، " د حرمينو سفرنامه"، "د کابل سفرنامه" او سلګونو مضمونه او مقالې شامل دي ۔
د پښتو ادبي سوسايټي اسلام اباد پخواني جنرل سيکرټري اقبال حسين خان افکار د اسرار د طورو د ادبي خدماتو په اړه مشال ريډيو ته وويل چې اسرار د طورو په ښوونځي کې استاد وو او په زرګونو شاګردان يې روزلي دي او په خپله ېې هم په پښتو او اردو ادبیاتو کې ماسټرۍ کړې وې ۔
د اسرار د طورو په جنازه کې د ګڼ شمير ليکوالانو ډاکټر اسرار، نورلبشر نويد، ډاکټر همايون هما، فيض الوهاب فيض او سياسي مشرانو پخواني صوبايي وزير عبدالسبحان خان، د خيبر پښتونخوا پخواني اعلا وزير امير حيدر خان هوتي او د مردان ميير حمايت الله مايار هم ګډون وکړ۔
