ملي جمهوري غورځنګ د فبرورۍ پر لسمه په یو غونډه کې د هغو غړو لومړی تلین لمانځلی چې یو کال وړاندې په میرامشا کې وژل شوي وو.
د بنو په پریس کلب کې جوړه شوې دې غونډه کې د یاد ګوند مرکزي او صوبايي مشرانو او لسګونه غړو ګډون کړی وو.
د ګوند مرکزي مخکښ او پخواني سېنېټر افراسیاب خټک مشال راډیو ته وویل چې "د ۲۰۲۴م کال د فبرورۍ پر ۱۰مه د دوی د بې ګناه ملګرو وینه توی کړل شوې وه."
ده وویل د هغې پېښې پر ککړو کسانو تر اوسه مقدمه نه ده درج شوې. نوموړي غوښتنه وکړه چې په دې اړه دې عدالتي پلټنې وشي.
د ګوند صوبايي مشرې بوشرې ګوهر مشال راډیو ته وویل چې دوی د خپل ګوند د هغو کارکونکو په یاد کې راټول شوي چې د دې په وینا، د جمهوریت لپاره یې قرباني ورکړې وه.
ملي جمهوري غورځنګ هم په هغو ګوندونو او ډلو کې شامل دی چې د ۲۰۲۴م کال د فبرورۍ پر اتمه په پاکستان کې پر ترسره شویو عامو انتخاباتو نیوکې کوي.
دوی تر هغو انتخاباتو دوې ورځې وروسته، د فبرورۍ پر لسمه د میرامشا چاوڼۍ مخې ته احتجاج کاوی چې په مبینه توګه پرې امنیتي ځواکونو ډزې کړې وې.
د یاد ګوند په وینا، په هغه پېښه کې د دوی څلور غړي وژل شوي او د ګوند د مشر محسن داوړ په ګډون ۱۵ نور ټپي شوي وو.
خو امنیتي ځواکونو تر اوسه پورې په دې اړه په رسمي توګه غبرګون نه دی ښودلی.
