د پښتونخوا ملي عوامي ګوند غړي او د پښتون ژغورنې غورځنګ مخکښ ارمان لوڼي شپږم تلین په کلاسېف الله کې ولمانځل شو.
د هغه د تلینغونډې تابیا پښتونخوا ملي عوامي ګوند کړې وه خو ګڼو سیاسي غړو، فعالانو، شاعرانو او لیکوالانو د نوموړي پر ژوند، قامي مبارزه او ادبي خدماتو رڼا واچوله.
د پښتونخوا ملي عوامي ګوند د کلا سېف الله مشر دارا خان جوګیزي د خپلې وینا مهال وویل چې ارمان لوڼي د خپلې کورنۍ او په ځانګړې توګه خپلې خور - وړانګې لوڼۍ - بې ساري روزنه کړې ده.
هغه زیاته کړه، "موږ نن په ارمان لوڼي ویاړو چې ژوند یې د پښتونخوا ملي عوامي ګوند او قامي مبارزه کې تېر کړ."
د ښځو د حقونو فعالې او د ارمان لوڼي خور وړانګې لوڼۍ د خپلې وینا مهال وویل چې د هغې ورور د خپلي قامي مبارزې، شاعرۍ تر څنګ د ولس ذهین سازي هم کوله چې په خپلو قامي ګټو یې پوه کړي.
نوموړې وویل، "ارمان د خلګو په منځ کې اوسېدی د خلګو رایه یې اخسته ، ماشومان، ځوانان او سپېنږیري یې اورېدل."
په ارمان لوڼي مشهور، د کالج استاد محمد ابراهم، د سیاسي هلو ځلو ترڅنګ په ادبي چارو کې هم خورا فعال او د پښتانه مترقي لیکوال غړی وو.
د هغه نژدې ملګري، شاعر او لیکوال محیب شېراز د خپلې وینا پر مهال وویل چې ارمان لوڼی یو رښتنی مبارز او د نوي کهول لپاره یې بې غرزه مبارزه کړې ده.
شېراز وویل، "دا هر څه دا څرګندوي چې ارمان شهید یو رښتینی قامي مبارز وو چې د نیوي کهول لپاره یې د بې غرزه مبارزې یو داسې بیناد کښېښود چې د تل لپاره د تاریخ برخه وګرځېده".
بل پلو پښتون ژغورنې غورځنګ هم د خپل مخکښ ارمان لوڼي د تلین لپاره په بېلا بېلو ځایونو کې غونډې جوړې کړې دي.
په دې کې یوه هم په جرمني کې جوړه شوې وه چې د پښتون ژغورنې غورځنګ مشر منظور پښتین هم ورته د انټرنیټ له لارې وینا وکړه.
د پښتانه مترقي لیکوال غړو نه یوازې د کلاسېف الله په غونډه کې ګډون کړی وو بلکې په ږوب کې یې له خپلې خوا د ارمان لوڼي پر ژوند او مبارزه غونډه جوړه کړې وه.
پښتون ژغورنې غورځنګ وايي، چې ارمان لوڼی د ۲۰۱۹م کال د فېبروري پر دویمه په بوري یا لورالایي کې پولیسو وهلی وو چې له کبله یې هغه روغتون ته پر لار سا ورکړې وه.
خو د هغه وخت د بلوچستان صوبایي حکومت هغه وخت دا خبره رد کړې وه او د هغه مرګ یې د زړه د ناروغۍ پایله بللې وه.
