د پښتون ژغورنې غورځنګ مخکښ او له جنوبي وزيرستانه د پاکستان د قامي اسمبلۍ پخوانی غړی علي وزير يو ځل بيا د يوې مياشتې لپاره زنداني شوی دی.
د بلوچستان د بلوڅ مېشتې حب ضلعې انتظامي مشرې یا ډېپټي کمېشنرې روحانه ګل کاکړې د جنورۍ پر ۳۰مه تر هغه سمدستي وروسته د عامه نظم د ګډوډۍ په تور د نوموړي د نيولو امر وکړ چې ځايي عدالت د علي وزير خلاف په وروستۍ مقدمه کې هم د هغه د خوشې کولو حکم وکړ.
په حب کې د علي وزیر وکیل حمل خان مري اېډوکېټ مشال راډيو ته وويل چې د ډېپټې کمېشنرې په امر د علي وزير پر ضد درې ايم پي او دفعه لګول شوې او هغه پکې نيول شوی دی.
ده وویل، "موږ چې نن د علي وزير د خوشي کېدو امر ګډاني زندان ته وروړ، نو د زندان مشر راته وويل چې علي وزير تر درې ايم پي او قانون لاندې د يوي مياشتي لپاره نيول شوی دی."
حمل خان مري اېډوکېټ زیاته کړه چې په درې ایم پي او کې د علي وزير يوځل بيا نيول کېده پرضد به عدالت ته ځي.
علي وزير له شاوخوا شپږو مياشتو راهيسې په بېلا بېلو قضيو کې لومړی په اسلام اباد او بيا وروسته د پنجاب ايالت په بېلا بېلو زندانونو کې بندي کړل شو، او له دوه نيمو مياشتو راهيسې بيا په بلوچستان ايالت کې بندي دی.
د حب انتظامي مشرې تر دې وړاندې هم، د ډېسېمبر پر پينځمه د عامه نظم د ګډوډولو (درې اېم پي او) په مقدمه کې د يوې مياشتې لپاره د علي وزير د زنداني کېدو امر کړی وو.
د وکيل حمل خان مري په وينا عدالت چې علي وزير په کومه وروستۍ مقدمه کې بري کړی دی دا مقدمه د بلوچستان په حب کې پولیسو د ۲۰۲۴م کال د دسمبر پر ۷مه درج کړې وه او تور یې پورې کړی وو چې علي وزیر د ګډاني په زندان کې له پولیسو ټوپک اخستی او پر هغوی یې ډزې کړې دي.
خو وکيل حمل خان مری وايي چې په ياد مقدمه کې پوليسو ګواهان اوهيڅ ثبوتونه عدالت ته نه وړان دي وړاندې کړي.
د ده په وینا، "د نورو مقدمو په څېر دا مقدمه هم د علي وزير پرضد يو دروغجنه مقدمه وګرځولی شو."
د اسلام اباد، راولپنډۍ ،جهلم او بکر ضلعو په بېلابېلو زندانونو کې تر بند وروسته د نومبر پر ۱۶ مه د بلوچستان پوليسو د علي وزير ګرفتاري د حب سېمې د ۲۰۲۲ کال په يوه مقدمه کې وښودله، خو ياده مقدمه په داسي حال کې درج کړل شوې وه چې علي وزير هغه مهال د کراچۍ په زندان کې بند وو.
پښتون ژغورنې غورځنګ پر علي وزیر لګېدلي تورونه په وار وار رد کړي او ويلي يې دي چې د هغو مقدمو هدف د غورځنګ د فعالیتونو مخه ډب کول دي.
