په افغانستان کې د طالبانو د حکومت ځينو مخالفو سیاستوالو د اسټريا یا اتریش په مرکز ويانا کې غونډه کړې چې پکې یې له طالبانو سره پر مذاکراتو ټينګار کړی دی.
د "يو جمهوري افغانستان لپاره د ويانا کنفرانس" نومي دې غونډه کې ګډونوالو وويل چې په افغانستان کې د ارامۍ لپاره د افغانانو ترمينځ خبرې اترې ضروري دي.
د افغانستان پخواني جهادي رهبر او د پارلېمان پخواني غړي محمد محقق غونډې ته وويل چې له طالبانو سره "مذاکرات" غواړي خو که داسې نه کېږي نو بیا به دويمې مرحلې ته تلل وي چې "مقاومت" دی.
د ملي مقاومت د جبهې مشر احمد مسعود بیا غونډې ته وويل چې د طالبانو مخالف سیاستوال بايد د راټولېدو مشترک ټکی پيدا کړي.
طالبانو تر اوسه د دې غونډې په اړه څه غبرګون نه دی ښوولی خو په تېر وخت کې یې ويلي چې مخالف سیاستوال یې ازمویل شوې څېرې دي.
له کله نه چې طالبانو، د ۲۰۲۱ کال د اګست پر ۱۵مه په افغانستان کې په زور حکومت نیولی، له هغې وروسته، د افغانستان ګڼ سیاستوال هېواد پرېښودو ته مجبوره شوي دي. د نړیوالو پر غوښتنو سربیره هم، طالبانو په حکومت کې له خپلو غړيو پرته بل چا ته ځای نه دی ورکړی.
