د خیبر پښتونخوا په بنو کې ځايي قبیلو جرګه کړې، چې پکې هغوی له حکومت او امنیتي چارواکو د هدفي بریدونو درولو او امنیت د ټینګښت غوښتنه کړې ده.
په بنو کې د ټولو قبیلو مشرانو د جون پر نهمه په لومړۍ امن جرګه کې له حکومته غوښتي ول چې هلته دې د وسلوالو پټنځایونه او مرکزونه ختم کړي.
د جون پر ۲۱مه د دویمې جرګې ګډونوالو وویل چې په سیمه کې وسلوال په ښکاره ګرځي، د ناامنۍ پېښې کېږي او هدفي بریدونه دوام لري، خو د هغوی په خبره، امنیتي ادارې او حکومت یې په کنټرولولو کې پاتې راغلی دی.
د جرګې یو مشر ملک موېز خان مشال راډیو ته وویل چې پر انتظاميې او حکومتي چارواکو غږ کوي چې حالات کنټرول کړي. نوموړي د سیمې پر ځوانانو هم غږ وکړ چې د امنیت لپاره غږ پورته کړي.
په وروستیو کې په بنو، لکي مروت ، ځونیخېلو (جانيخېلو) او شمالي وزیرستان کې یوشمېر حملې شوې دي چې ځايي اوسېدونکي يې د امنیت په اړه اندېښمن کړي دي.
حکومت لا د بنو د جرګې په اړه څه نه دي ویلي خو د سیمې د پولیسو مشر د جون پر ۲۰مه ویلي ول چې په سیمه کې د امن ټینګښت لپاره د وسلوالو خلاف عملیات کوي.
له دې پرته د خیبر پښتونخوا د عامې روغتیا د انجینرۍ چارو (پبلېک هېلت انجینییرنګ) وزیر پښتونیار خان د جون پر ۲۰مه مشال راډیو ته وویل چې ژر به د صوبې د اعلاوزیر په مشرۍ په یوه غونډه کې د ناامنۍ د ختمولو په اړه تګلاره جوړه شي.
ده زیاته کړه چې ناامني د صوبې تر ټولو لویه مسله ده چې حکومت یې د هواري لپاره خپل ټول وسایل په کار راولي.
