د ننګرهار ولایت په مومند درې ولسوالۍ کې د کښتۍ ډوبېدو په پېښه کې لږترلږه ۲۰ تنه وژل شوي دي.
چارواکي او ځای خلک وایي پېښه د جون پر لومړۍ نېټه په باسول سیمه کې شوې ده.
یو ځایي اوسېدونکي مشال راډیو ته وویل چې سهار مهال په ډوبې شوې کښتۍ کې د ښځو او ماشومانو په ګډون ۲۵ تنه سپاره ول. په پېښه کې پینځه کسان ژغورل شوي دي.
چارواکي وایي چې تر دې مهاله یې د پینځو کسان مړي له اوبو ایستلي دي او د نورو مړو د موندلو لپاره هڅې روانې دي.
د سیمې یو تن مراد لایق مشال راډیو ته وویل چې کښتۍ د نورو ورځو په څېر له بېلې کلي څخه باسول ته تلله چې ډوبه شوه. هغه وویل بېله کلی د کونړ سیند په یو ټاپو کې دی چې پل نه لري او خلک ترې د ورځنیو کارونو لپاره په کښتیو کې د ولسوالۍ مرکز ته راځي.
د ننګرهار د مومندرې لپاره د طالبانو د حکومت ولسوال مولوي محمد اجمل شګیوال مشال راډیو ته وویل چې د کښتۍ د ډوبېدو لامل لا تر دې دمه نه دی معلوم، خو په خبره یې بشپړ جزییات به وروسته له رسنیو سره شریک کړي.
د سیمې خلک وایي چې هر کال په اوړي کې د کونړ په سیند کې اوبه زیاتېږي او سږ کال د ورښتو له وجې په سیند کې اوبه زیاتې دي چې له امله یې په سیند کې څپې هم غټې دي او د کښتیو تګ راتګ پکې د نور کله پرتله ستونزمن دی.
په افغانستان کې او خیبر پښتونخوا په ځینو سیمو کې د پلونو د نشتوالي له وجې خلک په کښتیو کې تګ راتګ کوي چې ځینې وخت د کښتیو د اوښتو له وجې خلکو ته زیانونه اوړي.
د ۲۰۲۱ ز کال د جون په میاشت کې د ننګرهار په بهسودو کې کې د سيند له غاړې بلې ته د خلکو د وړلو کښتۍ د ډوبېدو په پېښه کې درې کسان وژل شوي ول.
تېر کال د خیبر پښتونخوا کوهاټ په تاندا ډېم کې کښتۍ ډوبه شوې وه چې ۵۲ کسان پکې وژل شوي ول. په ډوبو شویو کې زیاتره د یوې دیني مدرسې هغه زده کوونکي دي چې د سېل لپاره هلته ورغلي وو.
