د جنوبي وزیرستان په انګور اډه کې خلکو د احتجاج په ډول د فبرورۍ د اتمې له انتخاباتو پرېکون (بایکاټ) اعلان کړی دی.
له ۸۳ ورځو راهیسې د روان پرلت یو مشر قاري شریف د جنورۍ پر ۲۷مه مشال راډيو ته وويل چې دوی له افغانستان سره د سوداګرۍ اسانول، د تګ راتګ لپاره د انګور اډې لارې پرانیستل، په خپله سیمه کې امن، روغتيايي مرکزونه، ښوونځي، د موبایل ټېلېفون شبکه او انټرنېټ او پاخه سړکونه غواړي.
هغه زیاته کړه چې حکومت یې مسایل سنجيده نه ګڼي او مذاکرات ورسره نه کوي نو ځکه د فبرورۍ پر اتمه په کېدونکو ټاکنو کې برخه نه اخلي او خپلې رایې نه کاروي.
د جنوبي وزیرستان انتظامي چارواکو په وار وار مشال راډیو ته ویلي چې د پرلتوالو د غوښتنو پوره کولو هڅه کوي خو د احتجاجیانو په خبره، لا یې هم غوښتنې نه دي منل شوې.
د کوز جنوبي وزیرستان انتظامي مشر ناصر خان مشال راډيو ته وویل چې له پرلتوالو سره د خبرو له لارې د مسلو د هواري هڅه کوي.
د پاکستان او افغانستان ترمینځ پر ډېورنډ کرښه د تګ راتګ او سوداګرۍ یوشمېر لارې دي او د انګور اډې لاره جنوبي وزيرستان له پکتيکا ولایت سره تړي.
د انګور اډې ترڅنګ په چمن کې هم د اکتوبر له ۲۱مې راهسې په ګڼ خلک د دې لپاره پر پرلت ناست دي چې پاکستان له افغانستان سره د تګ راتګ لپاره د پاسپورټ او ویزې شرط ختم کړي او ورته دې د پخوا په څېر په شناختي کارډ، تذکرو یا په کومه بله اجازتنامه (پرمټ) د سفر اجازه ورکړي.
هغه احتجاجونه تر هغې وروسته پیل شول چې پاکستاني حکومت په اکتوبر کې اعلان وکړ چې د نومبر له لومړۍ راهیسې له افغانستان سره د تګ راتګ لپاره د پاسپورټ او ویزو لرل لازمي کوي.
