په افغانستان کې د بشري حقونو، په تېره بیا د ښځو او نجونو د حقونو په اړه د اندېښنو په دوام، اروپايي ټولنې پرون (د جولای په ۲۰مه) اعلان وکړ، چې د طالبانو د حکومت د پوهنې او عدلیې وزارتونو او همداراز د سترې محکمې سرپرستان یې تحرېم کړي دي.
دغي ټولنې په یوه اعلامیه کې، چې پر خپله وېبپاڼه یې خپره کړې، ویلي چې په افغانستان، جنوبي سوډان، مرکزي افرېقا جمهوریت، اوکراین او روسیې کې د بشري حقونو د سرغړونې په خاطر پر ۱۸ تنو او ۵ موسسو بندېزونه لګول شوي دي.
په دوام کې راغلي، ۶ تنه د جنسیت پر اساس د تشدد په خاطر د اروپايي ټولنې د بندېزونو په نوملړکې شامل کړل شوي.
په هغو کې د طالبانو د حکومت درې چارواکي هم شامل دي. د بندیزونو په نوملړ کې د طالبانو د حکومت د پوهنې سرپرست وزیر حبیب الله اغا، د عدلیې سرپرست وزیر عبدالحکیم شرعي او د سترې محکمې مشر قاضي عبدالحکیم حقاني نومونه شامل کړي دي.
د اعلامیې پر اساس، د طالبانو دا درې چارواکي له زده کړو د افغان نجونو په بې برخې کولو کې د لاس لرلو، او په افغانستان کې د نارینه وو يه څېر له ښځو سره د یو شان چلند د نه کولو په دلیل په تور لیست کې شامل کړي دي.
د اروپايي ټولنې د بندیزونو په لیست کې شامل کسان اجازه نه لري، چې د دې ټولنې هېوادونو ته سفر وکړي او یا د هغو له لارې بل هېواد ته لاړ شي.
همدا شان، که تحریم شوي کسان په اروپايي ټولنه کې شتمني ولري، کنګل کېږي.
تر دې وړاندې د سږ کال د مارچ په اوومه دغې ټولنې د طالبانو د لوړو زده کړو وزیر ندامحمد ندېم او د امربالمعروف او نهې عن المنکر وزیر شېخ محمدخالد حنفي له ښوونځیو او پوهنتونونو د نجونو د محرومولو او د ښځو د ځپلو په خاطر په تور لېست کې راوستي وو.
له بلې خوا، د اروپا د امنیت او همکارۍ په سازمان کې د اروپايي ټولنې استازولۍ پرون په یوه اعلامیه کې له زده کړو د افغان نجونو د راګرځولو او په ملي او نړیوالو موسسو او ادارو کې د افغان ښځو د کار د مخنېوي په خاطر د طالبانو پرېکړې په کلکه وغندلې.
په اعلامیه کې همداراز ویل شوي، اروپايي ټولنه له طالبانو غواړي چې د ښځو او نجونو خلاف خپلې پرېکړې بېرته واخلي.
په همدې حال کې د اروپا د امنیت او همکارۍ په سازمان کې د امریکا استازولۍ پرون په خپله اعلامیه کې ویلي، چې امریکا له طالبانو غواړي چې د مضبوط اقتصاد د احیا کولو په اړه پر خپلو ژمنو عمل وکړي.
اعلامیه زیاتوي، طالبان دې، بشري حقونه، په تېره بیا د ښځو او نجونو حقونه رعایت او د ترورېستي فعالیتونو پر ضد مبارزه وکړي.
طالبانو د ښځو خلاف د خپلو اقداماتو په دوام کې د ښځو سېنګاځایونه بند کړي او په دې توګه یې زرګونه ښځې، چې له دې لارې یې خپلو بچیانو او کورنیو ته ډوډۍ برابروله، له کاره وزګاره کړې دي.
د اروپایي ټولنې د دغو بندېزونو په اړه غبرګون په افغانستان کې د طالبانو د حکومت ویاند ذبیح الله مجاهد پر ټویټر لیکلي چې دا اقدام د هغه په وینا هيڅ یوه لوري ته ګټه نه لري. نوموړی وايي، د دې پرځای چې د فشار او تحریم له غوراوي څخه استفاده کیږي، باید له تعامل، دیالوګ او تفاهم څخه کار واخیستل شي، د افغانانو په وړاندې ناکامه تجربې تکرارول او تحمیلي سیاست نتیجه نه ده ورکړی.
د دوی ویاندویانو او چارواکو مخکې هم ویلي ول چې ښځو ته د " اسلامي شرېعت" په چوکاټ کې د حقونو ورکولو ته ژمن دي او له زده کړو سره یې مخالفت نه لري.
