په افغانستان کې د طالبانو د حکومت د صنعت او سوداګرۍ وزارت هغه سوداګر ورغوښتي چې د افغانستان له لارې د ترکمنستان ګېس په ټرانزېټ ډول پاکستان ته لېږدوي.
دې وزارت د جون پر ۲۴مه په یوه بیان کې ویلي چې دا سوداګر دې د خپلو اسنادو د اداري پړاوونو د بشپړولو لپاره دې وزارت ته ورشي.
بیان زیاته کړې چې د هېواد له لارو د ګاز او نورو نفتي موادو ټرانزیټ د ملي عوایدو د زیاتولو ترڅنګ د ټرانسپورټي سکتور د فعالېدو سبب کېږي او افغانانو ته د کار امکانات برابروي.
دا په داسې حال کې ده چې د پاکستان د بهرنيو چارو وزارت د جون پر ۲۲مه په يوه خبرپاڼه کې وويل چې د بهرنيو چارو د مملکت وزيرې حنا رباني کر د جون پر ۲۱مه تورخم ته د سفر پرمهال له افغانستان سره د سوداګرۍ زیاتولو او پر پوله د خلکو د تګ راتګ چارو اسانولو په برخه کې د اسانتیاو په ډېرولو ټينګار وکړ.
په وروستیو کې د پاکستان سوداګرو له روسیې څخه د مایع پېټرولي ګیس ۱۵ ټانکرونه د تورخم بندر له لارې درامد (وارد) کړي دي.
