د بېلا بېلو هیوادونو مشرانو او استازو په افغانستان کې پر واکمنو طالبانو غږ کړی چې د ښځو حقونو ته درناوی وکړي او داسې حکومت جوړ کړي چې ټول پکې شامل وي.
اروپايي ټولنې، ملګروملتونو، نړیوال بانک او د منځنۍ اسیا د هېوادونو استازو د مې پر ۲۶مه د ترکمنستان په مرکز عشق اباد د هغو هیوادونو او سازمانونو څلورمې غونډې په پایې کې له طالبانو غوښتنه وکړه چې د نجونو او ښځو پر زدهکړه او کار لګول شوي محدودیتونه لیرې کړي.
په هغې دوه ورځنۍ غونډه کې د افغانستان پر بشري او اقتصادي وضعیت هم بحثونه وشول او په ګډه اعلامیه کې په افغانستان کې د سولې ملاتړ وشو.
په اعلامیه کې په افغانستان کې د بشري حقونو او ازادۍ په اړه انديښنه ښودل شوې او له طالبانو غوښتل شوي چې افغانستان بیا "د نړیوالې ترهګرۍ په ځاله بدل نه کړي".
د اعلامیې ترمخه ترهګري، افراطیت، نشه یي توکي او له پولو ها خوا فعالیتونه ناقانونه ګڼل شوي او ویل شوي چې دا کارونه سیمه بې ثباتۍ ته بیایي.
ټاکل شوې چې پر افغانستان د 'منځنۍ اسیا د فارمټ' غونډه د روان کال په مني کې جوړه شي.
د عشق اباد په غونډه کې د افغانستان لپاره د ملګرو ملتونو ځانګړې استازي روزا اوتنبایووا، د افغانستان لپاره د اروپايي ټولنې ځانګړي استازي توماس نېکلاسن، په نړیوال بانک کې د افغانستان د برخې مشرې ملینډا ګوډ او د منځنۍ اسیا د هېوادونو ځانګړو استازو او ډیپلوماتو برخه اخیستې وه.
تر دې وړاندې د قطر په مرکز دوحه کې د افغانستان په موضوع غونډه شوې وه چې پکې تر ۲۰ څخه د زیاتو هېوادونو استازو برخه اخیستې وه خو طالبان ورته نه ول بلل شوي.
طالبان د ۲۰۲۱ز کال د اګست له ۱۵مې راهیسې پر افغانستان واکمن دي خو حکومت یې لا هم هېڅ هېواد په رسمیت نه دی پېژندلی.
نړیوال په افغانستان کې د ټولشموله حکومت ترڅنګ ښځو ته د تعلیم او کار د حقونو غوښتنه کوي. خو طالبانو د ښځو پر تعلیم او کار یولړ محدودیتونه لګولي دي.
طالبان وایي پر ښځو بندیزونه د هغوی کورنۍ موضوع ده چې بهرنیو هیوادونو ته ترې زیان نشته. د طالبانو د ریاست الوزرا سرپرست مولوي عبدالکبیر د مې پر ۲۵مه، د کابل په سپېدار ماڼۍ کې غونډې ته وویل، د طالبانو په سرپرست حکومت کې د هر قوم وګړي شته نو ځکه یې حکومت ټولشموله دی.
