په پښتون قامي اتحاد کې شریکو ملتپالو ګوندونو پرېکړه کړې ده چې د بدامنۍ او ترهګرۍ پرضد به د خیبر پښتونخوا په بېلا بېلو سیمو کې احتجاجونه کوي.
په پښتون قامي اتحاد کې د شریکو ملتپالو ګوندونو غړو د فبرورۍ پر شپږمه د پېښور په باچا خان مرکز کې تر غونډه وروسته خبري کنفرانس ته وینا وکړه.
دوی وویل چې د پښتون قامي اتحاد تر سیوري لاندې به د صوبې په بېلا بېلو ښارونو تو سیمو کې د بدامنۍ پرضد د "ولسي پاڅون" په نامه غونډې کوي.
د عوامي نېشنل ګوند د خیبر پښتونخوا صوبايي جنرل سیکرټرې سردار حسېن بابک خبري غونډې ته وویل چې د دې لړۍ لومړۍ احتجاجي غونډه به د فبرروۍ پر ۲۵مه د سوات په کبل کې کېږي.
ده وویل، د پېښور په پولیس لاين کې دننه وسله وال برید څرګندوي چې ترهګرۍ او بد امنۍ یو وبايي شکل اختیار کړی دی.
سردا حسېن بابک زیاته کړه، "هم دا وجه ده چې موږ د پښتون قامي اتحاد تر سیوري لاندې د نورو ولسي پاڅونونو پرېکړه کړې ده."
د نېشنل ګوند د خیبر پښتونخوا صوبايي مشر ډاکټر سرفراز خان وویل چې لومړۍ غونډه یې ځکه د سوات په کبل کې اعلان کړې ده چې د ده په وینا، د وسله والو طالبانو پخواني مشر ملا فضل الله په پښتونخوا کې د ترهګرۍ پیل له هم دې سیمې کړی وو.
ډاکټر سرفراز خان وویل چې د دې تر څنګ یې د مارچ پر ۲۱مه په پېښور کې د امن په اړه د یو سیمینار کولو پرېکړه هم کړې ده.
نوموړي په دې اړه زیاته کړه، "پښتانه پوهان به په دې سیمینار کې خپلې مقالې وړاندې کوي چې امن څه ګټې لري او د جنګ څه نقصانات دي، جنګي اقتصاد څه ته وايي، دا څه رنګه جوړ کړل شوی دی او د امن اقتصاد به څه رنګ جوړوو؟"
د فبرورۍ پر شپږمه شوې دې غونډه کې د شریکو ګوندونو استازو په خیبر پښتونخوا او بلوچستان کې د بدامنۍ پر زیاتې شوې لړۍ اندېښنه وښودله.
پښتون قامي اتحاد تر دې وړاندې د ۲۰۲۲م کال د نومبر پر څلورمه د صوابۍ په امبار سیمه کې د "پښتون امن مارچ" په نوم لاریون او لویه جلسه کړې وه.
دوی په هغه جلسه کې له حکومته غوښتنه کړې وه چې امنیت دې ټینګ کړي، د بد امنۍ، هدفي وژنو، قلنګ اخیستو، د جبري لادرکۍ او د طالبانو د بیا مخې ته راتلو مخه دې ونیسي.
په پښتون قامي اتحاد کې شریکو ګوندونو په داسې وخت کې د ترهګرۍ ضد احتجاجونو لا زیاتولو پرېکړه کړې ده چې تېره اونۍ د وزیراعظم شهباز شریف په مشرۍ کې د ایپیکس کمېټۍ غونډې د ملک پر امنیتي حالت بحث وکړ.
شهباز شریف ولس ته د امن باوري کولو ډاډګېرنه ورکړې وه خو پښتانه ملتپال مطمین نه دي هغه ځکه چې د دوی په وینا، تر دې وړاندې هم د ترهګرۍ ضد نېشنل ایکشن پلان جوړ شوی وو خو عملي نه شو.
