د خيبر پښتونخوا په ډېره اسماعيل خان کې پولیسو ادعا کړې چې دوه ځانمرګي بريدګر يې هدف ته تر رسېدو وړاندې وژل شوي دي.
د دې ځای د پولیسو مرستيال مشر ډي اېس پي عدنان خان نن (د اکتوبر پر ۲۵مه) مشال راډيو ته وويل چې دغو مشکوکو کسانو غوښتل چې د شېخ يوسف اډې سيمې سره نيږدې د امن کمېټۍ پر دفتر بریدونه وکړي خو د دفتر ساتونکي پرې مخکې شول او هغوی یې ووژل.
پولیسو دا نه دې ويلي چې دغه مشکوک کسان د کومې وسله والې ډلې غړي دي خو د ځايي امن کمېټۍ يو مشر سراج خان مشال راډيو ته وويل چې دا بریدګر د تحريک طالبان پاکستان غړي ول. د هغه په خبره د حمله کوونکو هدف د ډېره اسماعيل خان د امن کمېټۍ مشر نور عالم وو خو هغه ته څه زیان نه دی رسېدلی.
تحريک طالبان پاکستان وسله والې ډلې تر اوسه په دې اړه څه نه دې ويلي.
