د پښتون ژغورنې غورځنګ (پي ټي اېم) مشر ويلي، د خپل يو زنداني مشر علي وزير پرضد د مقدمو ختمولو په لړ کې يې له سيند حکومت سره "رابطې" شوې دي.
د فبرورۍ پر ۲۰مه نېټه له مشال راډيو سره د خبرو پر مهال منظور پښتين وويل چې د احتجاجي پرلت له لارې له سيند حکومته غواړي چې د علي وزير پرضد درج شوي اېف ای ارونه (مقدمې) دې بیرته واخلي. "هيله من یو چې صوبايي حکومت به ژر تر ژره د دې مسلې يو څه حل راوباسي او که غوښتنې مو و نه منل شوې نو په راتلونکې کې د لانګ مارچ اراده لرو."
غورځنګ د منظور پښتين په مشرۍ د فبرورۍ له ۱۳مې نېټې راهيسې د علي وزیر د خوشې کولو د غوښتنې په خاطر د سيند اسمبلۍ مخې ته پرلت وهلی دی چې پکې د ګډون لپاره د هېواد له نورو برخو هم د پي ټي اېم پلويان ورغلي دي.
منظور پښتين له سيند حکومت سره د رابطې خبره په داسې حال کې کړې چې د غورځنګ مشرانو به دا شکايت کاوه چې تر يوې اوونۍ زيات وخت تېر شوی خو لا هم حکومت ورسره رابطه نه ده کړې.
منظور پښتين له حکومت سره د "تماسونو" په اړه له نورو جزییاتو ورکولو ډډه وکړه خو د پي ټي اېم يو بل مخکښ نورالله ترين د فبرورۍ پر ۲۰مه مشال راډيو ته وويل چې دوی د سيند د بلدياتو له وزیر ناصر حسين شاه او د اطلاعاتو له وزیر سعيد غني سره خبرې اترې شوې خو د ده په وينا، لا هم کومې نتیجې ته نه دې رسېدلي. ده زیاته کړه چې ښايي له حکومتي ډلې سره نورې ناستې هم وکړي.
خو د سيند حکومت د نوموړي د څرګندونو په اړه لا څه نه دې ويلي.
حکومت دريځ لري چې د علي وزیر پرضد مقدمې په عدالت کې روانې دي نو په قانوني توګه نه شي کولای چې پرضد يې درج شوې مقدمې ختمې کړي.
د سیند حکومت ویاند مرتضا وهاب د فبرورۍ پر۱۸مه په کراچۍ کې خبريالانو ته ويلي ول چې د علي وزیر خوشې کول او هغه له مقدمو څخه بري کول د حکومت په اختیار کې نه دي.
خو د پاکستان سپريم کورټ وکيل صلاح الدين ګنٖډه پور د فبرورۍ پر ۱۹مه له مشال راډيو سره په خبرو کې وويل چې د سیند حکومت قانوني اختیار لري چې د علي وزیر خلاف کښلې مقدمې بيرته واخلي. د نوموړي په خبره، مقدمې د حکومتي اجازې پرته نه شي جوړېدلای.
د ده په وینا، د دا رنګ مقدمو لپاره د صوبايي حکومت د کابينې اجازه په کار وي او دا چې د علي وزير خلاف مقدمې د سيند حکومت په اجازه شوې دي.
ګنډه پور زیاتوي چې د سيند حکومت وزير اعلا دا اختيار لري چې دغه مقدمې بيرته واخلي. "د پاکستان د ضابطه ای فوجدارۍ د قانون [له] ۴۹۳مې [مادې سره سم] حکومت خپله مقدمه بيرته اخیستلی شي او د علي وزير پرضد جوړي مقدمې يوازې د سيند حکومت بيرته اخیستي شي بلڅوک دا مقدمې نشي اخستلی او که سيند حکومت و غواړي نو هوم سېکرټر په يوه خط دا مقدمې ختمولای شي."
علي وزیر له تېرو شاوخوا ۱۴ مياشتو راهيسي د کراچۍ په زندان کې بندي دی چې د رياست خلاف د ويناګانو او د رياستي ادارو پروړاندې د خلکو پارولو تورونه پرې لګېدلي خو هغه او وکيلان يې دا تورونه ردوي او وايي چې پي ټي اېم له سوله ییزې لارې د پښتنو حقونه غواړي.
