د غورځنګ د مشر منظور پښتين په ګډون محسن داوړ، علي وزير، عبدالله ننګيال او نور مشران هم ورغلي دي.
په کراچۍ کې د پښتون ژغورني غورځنګ مشران وايي، د جلسې لپاره يې د ښار مرسيتال کمشنير ته درخواست ورکړی وو خو انتظاميې ورته اجازه نه ده ورکړې.
د کورونا وايرس مخنيوي لپاره صوبايي حکومت پر جلسو او نورو غونډو بنديز لګولی دی.
د پښتون ژغورنې غورځنګ مشران دريځ لري چې په هېواد کې سياسي ګوندونه جلسې کوي نو دوی يې هم کوي البته د کورونا وايرس مخنيوي لارښوونې عملي کوي.
پښتون ژغورني غورځنګ وايي، حکومت او امنیتي چارواکي دې قبایلي سیمې له ځمکلاندې بمونو پاکې کړي، د هدفي بریدونو مخنیوی دې وکړي، پر امنیتي پوستو دې خلک نه ځوروي، ټول ورک کسان دې عدالت ته وسپاري او ماورای عدالتي وژنې دې ودروي.
د غورځنګ په نورو غوښتنو کې دا هم شامل دي چې د قبایلي سیمو په ګډون دې په نور پاکستان کې د ترهګرۍ او ناامنیو ټولو پېښو پلټنو لپاره دې د حقایقو موندلو او جوړجاړي (ټروت اېنډ ريکنسیلیېشن) کمېشن جوړ کړي.
حکومت او پوځ وايي د غورځنګ غوښتنې جایزې دي او وار له مخه یې د ځینو پر پوره کولو له شاوخوا دوو کلونو راهیسې کار ته دوام ورکړی.
