اسلام اباد/ پېښور - د اسلام اباد په فیض اباد کې د مذهبي ډلو د احتجاج ختمولو لپاره چې پوليسو کوم عملیات پیل کړي وو، هغه تېر مازیګر ودرول شوي او د حساسو ځايونو حفاظت لپاره پوځ ورغوښتل شوی دی. د تېرې ورځې په عملیاتو کې د مظاهره کونکیو او پولیسو ۲۰۰ کسان ژوبل شوي دي.
حکومتي چارواکي وايي د عملیاتو پر مهال ۱۵۰ و نه زیات مظاهره کونکي نیول شوي هم دي. بل پلو راپورونه وايي چې مظاهره کونکي لا هم په فیض اباد کې موجود دي.
که څه هم حکومت د امنيت ټينګ ساتلو لپاره پوځ هم بللی خو د پوځ لخوا په خپور شوي یو بیان کې راغلي چې د مظاهرچيانو د خورولو لپاره په روايتي توګه پوځ نه کارول کېږي، بيا هم پوځ تيار دی.
د پاکستان د کورنيو چارو وزارت له خوا د شنبې په ورځ يوه اعلاميه خپره شوې چې پکې راغلي پوځ د امنیت د ټینګولو لپاره غوښتل شوی دی.
تر اسلام اباد او نورو ښارونو وروسته، د یکشنبې پر ورځ یو شمېر خلک په پېښور او نوښار کې هم ورغونډ شوي ول او مظاهرې او لاریونونه یې وکړل.
په پېښور کې د مظاهرې ویډیو
تحريک لبیک يارسول الله، تحريک ختم نبوت او سني تحريک په ګډون ېو شمېر مذهبي ګوندونو له هغې ورسته په احتجاج لاس پورې کړ چې په اکتوبر کې د پاکستان پارلېمان د ۲۰۱۷ز کال ترمیمي انتخاباتي قانوني مسوده منظوره کړه نو په هغې کې د اميدوارانو د سوګند په ځای کې لفظي بدلون شوی و او پکې د اسلام پر پیغمبر د ((ایمان)) د ((قسم)) پر ځای د ((زه باور کوم)) الفاظ راغلي وو.
خو حکومت بیا وروسته ویلي وو چې هغه تېروتنه اصلاح شوې ده او مظاهره کونکي باید خپل احتجاج ختم کړي.
